Ategorrietako Maria del Carmen etxeko obren legezkotasunaz galdetu du EH Bilduk
Ategorrietako Maria del Carmen etxearen egoera, lanak hasi aurretik. Ancora 
Ategorrietako Maria del Carmen etxeko obren legezkotasunaz galdetuko du EH Bilduk Lurraldearen Garapen eta Plangintza Batzordean, hilaren 12an. Izan ere, zazpi hilabete igaro dira 2023ko apirilean Gipuzkoako Probintzia Fiskaltzan Ategorrietako Galtzada Zaharreko 21. zenbakian dagoen Maria del Carmen etxearen eraispena salatu zenetik, “beren bidegabekeria jakinda, eraikuntza horretan elementu babestuak eraisteko aldeko txostena eta lizentzia eman zuten agintari edo funtzionario publikoen aurka”, adierazi du EH Bilduk.
Uztailean aurkeztutako salaketa ikusita, Fiskaltzak honako hau erabaki zuen Dekretu bidez: “Prozesu aurreko ikerketa eginbideak abiaraztea eta salatutako ekintzak argitzeko beharrezkoak diren jarduketa guztiak egitea. A priori, ondare historikoari buruz, agintaritza edo funtzionario publikoaren prebarikazio modalitatean, eta partaideen balizko erantzukizunari buruz”.
EH Bilduk azaldu duenez, Hirigintza Sostengarriko ordezkariak 2022ko irailaren 14an erabaki zuen Maria del Carmen etxerako Obra Handiko lizentzia ematea. “Aipatu lizentziaren aurka Fiskaltzan salaketa aurkeztu zuen ondarea babestearen aldeko Ancora elkarteak”, esan du.
Gaineratu du EH Bilduk ez dakiela zein egoeratan dauden aipatutako izapideak, ezta egiten ari diren obrak bat datozen aplikatu beharreko hirigintza araudiarekin, hala nola Udal Gobernuak emandako Obra Handiko Lizentzian baimendutakoarekin.
Horregatik, otsailaren 12an interpelazio bat aurkeztuko diote Nekane Arzallus Hirigintza Iraunkorreko ordezkariari Lurraldearen Garapen eta Plangintza Batzordean, egoera honetara zein arrazoirengatik iritsi den galdetzeko eta lanak 2021/176 Obra Handiko Lizentziaren babespean dauden galdetzeko, besteak beste.
