Liderra hartuko du etxean Bera Berak
Etxean jokatuko dute asteburuan Realeko mutilek eta neskek, eta baita Bera Berak ere. Gipuzkoa Basketek, aldiz, kanpoan jokatuko du gaur bertan.
Zakharyan, Osasunaren aurkako kopako partidako une batean. Bera Bera 
Neurketa garrantzitsua jokatuko du Bera Berak igandean, Elx liderra hartuko baitu Gaskan. Denboraldi bikaina egiten ari dira Elxekoak, soilik hiru partida galdu baitituzte; ligako liderrak dira, Malagarekin 26 puntura berdinduta. Donostiarrak, aldiz, hirugarrenak dira, 25 punturekin. Horrela, etxean irabaziz gero, kolpe bat joko lukete mahai gainean, lidergora igoz.
Futbolean, derbi asteburua daukate Realeko mutilek, Osasunaren aurka jokatuko baitute etxean larunbatean. Txuri-urdinek zita garrantzitsu asko dituzte datozen asteotan, kopako finalerako sailkatzeko aukera eta Paris Saint Germainen aurkako Txapeldunen Ligako final-zortzirenetako joanekoa bereziki, baina ezin du liga ahaztu. Izan ere, hurrengo urtean Europan jokatu nahi badu, puntuak batzen jarraitu behar du, goiko postuetatik ez jaisteko. Osasunari dagokionez, sailkapenaren erdialdean dago, nahiko eroso, baina derbi bat da larunbatekoa, eta derbiak gogorrak dira beti.
Bestalde, Realeko neskak indartsu eta morala igota datoz, kopako finalerdietarako sailkatu berri baitira. Ordea, beraiei ere komeni zaie liga ez ahaztea, sailkapenean gora egiten jarraitu nahi badute (zazpigarren postuan daude). Granada hartuko dute Zubietan igandean, ligako azken-aurren sailkatua, eta beraz, partida aproposa da hiru puntuak batzeko.
Saskibaloian, Gipuzkoa Basketek gaur bertan jokatuko du jardunaldi honetako partida, Burgosen, Tizonaren etxean. Donostiarrak ligako hirugarrenak dira, baina atzetik presionatzen dituzte hainbat talde, tartean Tizona bosgarrena. Horrela, gogor borrokatu beharko dira hirugarren postuari eutsi eta lehenengo biei presioa sartzen jarraitzeko.
PARTIDAK
Eskubaloia
Emakumezkoen liga, 17. jardunaldia
- Bera Bera — Elx (igandea, 11, 12:00)
Futbola
Gizonezkoen liga, 24. jardunaldia
- Reala — Osasuna (larunbata, 10, 16:15)
Emakumezkoen liga, 17. jardunaldia
- Reala — Granada (igandea, 11, 12:00)
Saskibaloia
Gizonezkoen bigarren mailako liga, 20. jardunaldia
- Tizona — Gipuzkoa Basket (ostirala, 9, 21:00)
