Agitiko arrain haztegi zaharra desmuntatzeko eta kala lehengoratzeko eskatu du Eguzkik
Igeldoko arrain haztegiak 2006an utzi zion funtzionatzeari, eta Eguzkik nabarmendu duenez, instalazioak "zeharo abandonatuta eta txiki-txiki eginda daude".
Agitiko arrain haztegi zaharra erabilerarik gabe dago.Eguzki 
Agitiko arrain haztegia “desmuntatzeko” eta “parajea lehengoratzeko” bidea has dezala eskatu dio Eguzkik Kosta Zerbitzuari. Bi egiteko daudela jakinarazi dute: batetik, bertan behera uztea arrain haztegia jabari publikoan eraikitzea ahalbidetu zuen emakida, eta, bestetik, Culmanor SA enpresari, instalazioak desmuntatzeko eta parajea lehengoratzeko proiektu bat aurkez dezala eskatzea, Kosta Legeak aurreikusi bezala.
Culmanor SAk erreboiloa gizentzeko eta txirla hazteko instalazioak 1989an eraiki zituen Agitin, Igeldoko kostan, itsas lehorreko jabari publikoko babes eremuko 21.424 metro koadroko lursail batean. Horretarako baliatu zen 1991ko apirilaren 8ko ministro agindu baten bidez eskuratutako emakida batez.
Arrain haztegiak 2006an utzi zion funtzionatzeari eta emakida 2011n iraungi zen, Eguzkik jakinarazi duenez. Geroztik, enpresa instalazioak martxan jartzen saiatu da berriz ere, erreboiloak eta itsas amuarrainak hazteko. Ez du lortu, ordea, eta talde ekologistak nabarmendu duenez, instalazioak “zeharo abandonatuta eta txiki-txiki eginda daude”.
Nolanahi ere, “hemezortzi urte pasatu dira haztegiak funtzionatzeari utzi zionetik eta hamahiru urte emakida iraungi zenetik”. Gauzak horrela, “logikoa” da Eguzkirentzat jabari publikoaren emakida bertan behera uztea eta parajea lehengoratzeko bideari ekiteak. Eguzkik dio enpresaren dokumentazioan bertan aitortzen denez, “arrain-haztegia inguruko paisaia-kalitatearen degradazio elementu bat” dela.
