Mirakontxa-Easo tartearen bi hondeaketa fronteek bat egin dute gaur goizean
Mirakontxa-Easo tarteko hondeaketa lanak amaitu dituzten unea.Irekia 
Mirakontxa-Easo tartearen bi hondeaketa fronteek bat egin dute gaur goizean, eta zuloa irekitzeko ekitaldian Iñaki Arriola Eusko Jaurlaritzako Lurralde Plangintza, Etxebizitza eta Garraio sailburua, Pedro Marco Azpiegitura eta Garraio sailburuordea eta Eneko Goia alkatea bertan izan dira.
Obrako ekipoek kalea egin duten unean egin dute ekitaldia eta Easoko lurpeko geltokiko haitzuloa bisitatu dute. Ekitaldi hau aspaldi egitea espero zen; izan ere, 2017an hasi ziren konexio hau egiteko obra lanak.
2020an metroaren lanak zirela eta, Zubieta kalean eragindako bigarren zuloak obren erritmoa aldatu zuen. Ondorioz, obra geldiarazi behar izan zuten. Horregatik, bi hondeaketa fronteek bat egin duten espazioak konplexutasun tekniko eta geologiko handia zuenez, azken hilabeteetan obren erritmoa egoerara egokitu behar izan dute: hilean 6 metro inguruko erritmoan hondeatzea erabaki zen.
Iñaki Arriola sailburuak azaldu duenez, “gaur goizeko kaleak bat egiteak, Euskal Trenbide Sareko lantaldeak eta lan honetan egunero lan egiten duten profesional guztien gaitasun tekniko handia erakutsi du. Azken hilabeteetan tentuz egin da lan tarte horretan, erronka geologikoak eta ingeniaritzakoak gaindituz, lurzoru konplexu batean soluzio aurreratuak gauzatuz tunelak eremu karstikoan egiteko”. EAJk sare sozialetan metroaren igarobidearen tunelaren bi aldeak elkartu izana ospatu du.
Hondeaketako bi fronteak elkartu ondoren “tunela zulatzen” jarraituko dutela azaldu du Eusko Jaurlaritzak, “beheko aldea osatzeko”. Lurperatutako saihesbidearen hondeaketa lan guztiak baita datorren irailerako amaitzea aurreikusten dute ere. Ondorengo lanen artean “tunela hormigoiztatzea eta arkitektura arloko akaberak egitea” daude, obra zibila “amaitutzat emateko eta instalazioen faseari ekiteko”.
