'Faisaien irla' filma errodatzen hasi dira, Jone Laspiurren azken filma
Irun eta Hendaia arteko mugan izandako migranteen heriotzak izango ditu hizpide filmak.
Asier Urbieta zuzendaria eta Sambou Diaby eta Jone Laspiur aktoreak. 
Joan den ostegunean hasi zen errodatzen Faisaien Irla Asier Urbietaren lehen film luzea. Irunen, Hendaian, Donostian eta Baionan errodatuko dute datozen sei asteetan.
Andoni de Carlosekin (Handia) batera idatzia, euskaraz, frantsesez eta gaztelaniaz filmatzen ari dira, eta protagonistak dira Jone Laspiur donostiarra (Akelarre, Ane eta Negu hurbilak, bihartik aurrera zinema aretoetan ikusgai) eta Sambou Diaby zumaiarra. Gainera, Itziar Ituñoren eta Josean Bengoetxearen kolaborazio berezia ere badu pelikulak.
Faisaien Uhartea, munduko kondominio txikiena da, sei hilabetean behin, Espainiaren eta Frantziaren artean banatzen da. Bidasoa ibaiaren bokalean dago, eta bertan, azken urteetan Irun eta Hendaia arteko muga gurutzatzear zirela, gutxienez bederatzi lagunek galdu dute bizia.
Pelikulan, hilotz bat agertuko da Faisaien Uhartean, eta horrek hankaz gora jarriko du Laida (Jone Laspiur) eta Sambou bikotearen bizimodua.
Gidoilarien hitzetan, “La Isla de los Faisanes pisu emozional handiko thrillerra da, eta mugen zentzugabekeria eta eragiten dituzten giza ondorioak” ditu kontagai. Gaur egun Bidasoaren ertzetan gertatzen ari den errealitate bat erakusten du film honek: azken urtean, hamar bat pertsona desagertu dira bertan Frantziara pasatu nahian”.
