Memoria historikoa
Espainiako Errepublikaren defentsan errepresaliatutakoen omenezko plaka berrezarri du udalak
Donostiako Udalak Saguesen Espainiako II. Errepublikaren defentsan fusilatutako eta errepresaliatutako pertsonak gogoratzen dituen plaka berriro ere jarri du.
Cristina Lagé Berdintasun zinegotziak gogorarazi duenez, “plaka Errepublikaren legezkotasuna defendatzeagatik errepresio frankista jasan zutenen aitortza bat da, baita fusilatuak izan zirenak oroitzeko ere. Hiriaren eta Donostiako herritar guztien oroimenez, ezinbestekoa da plaka hau ordezkatzea, behar adina aldiz, diktadura frankistaren errepresioa aurrez aurre jasan zutenak ez ahazteko “.
Plaka 2005eko apirilaren 30ean jarri zuen udalak Aita Claret plazan. 2011n berrezarri zen, lapurtu ondoren. Orain, berriz ere jarri du udalak plaka, desagertu egin zela salatu ondoren.
