Ibaeta Basketek titulurako kanporaketak eskura ditu
Irabazteko aukera garbiak izan arren, Realeko mutilak eta neskak berdinketarekin konformatu behar izan dira.
Ibaeta Basketek aise menderatu du Bembibre.Ibaeta Basket 
Jardunaldi bat falta da emakumezkoen saskibaloi liga bukatzeko, eta Ibaeta Basketek eskura ditu titulurako kanporaketak. Larunbatean aise gainditu zuten Bembibre azken sailkatua (52-89). Garaipen horri esker sailkapen nagusiko zazpigarren postuan daude, eta lehen zortzi sailkatuek jokatuko dituzte kanporaketak. Denboraldia borobiltzeko aukera ona dute Azu Muguruzak gidaturikoek. Gizonezkoen bigarren mailako ligan, berriz, Gipuzkoa Basketek galdu egin zuen Estudiantes indartsuen aurka (90-81).
Futbolean ez da asteburu ona izan Realeko bi taldeentzat. Neskek bana berdindu zuten Zubietan Sporting Huelvaren kontra, eta irabazi ezinda jarraitzen dute. Mirarik egin zuen txuri-urdinen gola, eta ez ziren gai izan bigarrenez aurkariaren atea zulatzeko. Mutilek ere berdindu egin zuten Almeria azken sailkatuaren aurka Anoetan (2-2). Azken minutuetan Zubeldiak egindako penalti batek talde txuri-urdina zigortu zuen. Izan ere, partida ona jokatu zuten, galtzen hasi arren. Markagailua Beckerren eta Oiarzabalen golekin irauli zuten. Ordea, ez zen nahikoa izan, eta puntu bakarrarekin konformatu behar izan zuten. Seigarren postua egonkortzeko aukera ona galdu zuten.
Azkenik, belar hockeyan, Realak ezin izan zuen Jolaseta azken sailkatua mendean hartu. Neurketa ona jokatu arren, arerioak partida berdintzea lortu zuen txuri-urdinen ahalegina zapuztuz (2-2). Aldiz, gizonezkoen ligan beste porrot mingarri bat pairatu zuen Donostiako Atletikok. Oraingoan, Junior taldeak bederatzi gol egin zizkion.
EMAITZAK
Saskibaloia
Emakumezkoen liga, 29. jardunaldia
- Bembibre 52 – Ibaeta Basket 89
Gizonezkoen bigarren mailako liga, 30. jardunaldia
- Estudiantes 90 — Gipuzkoa Basket 81
Futbola
Emakumezkoen liga, 23. jardunaldia
- Reala 1 – Sporting Huelva 1
Gizonezkoen liga, 31. jardunaldia
- Reala 2 – Almeria 2
Belar hockeya
Emakumezkoen liga, 16. jardunaldia
- Reala 2 – Jolaseta 2
Gizonezkoen liga, 16. jardunaldia
- Junior 9 – Donostiako Atletiko 0
