Ibaeta Basketek denboraldiko helburuetako bat bete du
Ibaeta Basketeko neskak larunbateko garaipen garrantzitsua ospatzen.Ibaeta Basket 
Ligako titulurako kanporaketak jokatuko ditu Ibaeta Basketek. Larunbatean balentria egin zuten Azu Muguruzak gidaturiko neskek Ensino Lugori irabazita. Ez zen neurketa erraza izan, markagailuaren atzetik ibili zirelako donostiarrak, baina azken laurden paregabeari esker lortu zuten garaipen garrantzitsua. Zazpigarren bukatu dute liga, eta titulurako final laurdenetan Valentziaren kontra ariko dira. Joanekoa Gaska kiroldegian jokatuko dute hilaren 25ean, 20:00etan. Itzulerakoa, berriz, Valentzian izango da hilaren 28an, 18:30ean.
Bestalde, Gipuzkoa Basket ez zen gai izan Betisi etxean irabazteko. Goiko postuen lehian irauteko erabakigarria zen partidan huts egin zuten.
Futbolean, jardunaldi eskasa izan da Realeko bi taldeentzat. Gizonezkoek berdindu egin zuten Getaferen etxean, neurketa irregularra jokatuta. Txuri-urdinak markagailuan aurretik jarri ziren Ander Barrenetxea donostiarraren gol bati esker. Ordea, Getafek berdintzea lortu zuen, eta irabazteko aukera gehiago izan zituzten. Puntu bakarrarekin, seigarren postuan egonkortzeko helburua pixka bat zaildu zaio Realari, Betis hiru puntura jarri delako. Emakumezkoek, berriz, burua altxa ezinda jarraitzen dute. Ana Tejadak talde txuri-urdina uztea erabaki duen aste berean, beste porrot bat jaso zuten, Valentziaren zelaian. Kopako finala da Realari sasoi honetan geratzen zaion helduleku bakarra.
Belar hockeyan, Realeko neskek berdinketa ona lortu zuten Terrassaren zelaian, irabaztetik gertu egon arren. Izan ere, etxeko taldeak azken unean berdindu zuen neurketa. Donostiako Atletikok, berriz, beste gol zaku bat jaso zuen etxean, Terrassaren kontra.
EMAITZAK
Saskibaloia
Emakumezkoen liga, 30. jardunaldia
-
Ibaeta Basket 70 – Ensino Lugo 63
Gizonezkoen bigarren mailako liga, 31. jardunaldia
-
Gipuzkoa Basket 93 – Betis 99
Futbola
Gizonezkoen liga, 32. jardunaldia
-
Getafe 1 – Reala 1
Emakumezkoen liga, 24. jardunaldia
-
Valentzia 3 – Reala 0
Belar hockeya
Emakumezkoen liga, 17. jardunaldia
-
Terrassa 1 – Reala 1
Gizonezkoen liga, 17. jardunaldia
-
Donostiako Atletiko 0 – Terrassa 7
