Realak liderra hartuko du etxean, magikoa izatea nahi duten gauean
Txuri-urdinek Real Madrilen kontra jokatuko dute Anoetan, 21:00etan.
Ander Barrenetxea eta Take Kubo gol bat ospatzen.Reala 
Sei partida falta dira gizonezkoen futbol liga bukatzeko, eta seiak final gisa hartu beharko ditu Realak. Datorren denboraldia Europako txapelketaren bat jokatzeko aukera garesti jarri da talde txuri-urdinarentzat. Seigarren postuan eta hiru puntuko abantailarekin dauden arren, ezin dira lokartu. Valentzia eta Betis prest daude Realari Europako txartela kentzeko. Hori gertatu ez dadin, gaur gauean has daitezke helburua sendotzen. Real Madril liderra hartuko dute txuri-urdinek Anoetan, 21:00etan. Arerio zailena dirudi hiru puntuak lortzeko, baina Reala hazi ohi da horrelako neurketa garrantzitsuetan. Gainera, David Silva txuri-urdin ohi eta aztia omenduko du klubak, eta gaua magikoa izango da irabazten bada.
Realeko neskak ere sasoiko azken txanpan sartuko dira. Sei neurketa dituzte denboraldi irregularra ahalik eta ondoen bukatzeko. Maiatzaren 18ko kopako finalak eta Ana Tejadaren agurrak baldintzatuta, puntu premia du Natalia Arroyoren taldeak. Sailkapenean zortzigarren postuan daude 29 punturekin, eta nabarmen urrundu dira gainetik dituzten taldeak. Etzi, Atletico Madrilen aurka ariko dira Zubietan (16:00), eta kopako finalerdietan lorturiko balentria errepikatzen saiatuko dira.
Eskubaloian, Bera Berak ohorezko mailako titulurako finalerdiak jo puntuan ditu. Biharko jokatuko dute Valladoliden kontrako final-laurdenetako itzulerakoa, Gaska kiroldegian (18:00). Joanekoak aise menderatu zituzten espainiarrak (27-34), eta berdinketa batekin nahikoa litzateke kanporaketetan aurrera egiteko.
Saskibaloian, Ibaeta Basketek ligako titulurako final-laurdenak ditu jokoan. Atzo Valentziaren aurka puntu batengatik galdu ondoren, etzi jokatuko dute kanporaketek itzulerakoa arerioaren pistan (18:30). Azu Muguruza entrenatzaileak adierazi du puntu bakarreko desabantaila hori iraultzeko gai dela taldea. Gipuzkoako Basketi, berriz, hiru partida geratzen zaizkio igoera faserako txartela ziurtatzeko. Ligako lehen bederatziek jokatzen dute, txapeldunak izan ezik, eta donostiarrak seigarren tokian daude, momentuz. Bihar, Fuenlabradaren pistan ariko dira (18:30).
Belar hockeyan, Realeko neskek sailkapenean atzetik duten Sanse Complutense izango dute aurkari bihar, Zubietan (15:00). Seigarren tokian daude, taularen erdian, eta bosgarren postura iristeko arrakala handiegia da. Aldiz, Donostiako Atletikok etzi jokatuko du Taburienteren kontra (12:30).
PARTIDAK
Futbola
Gizonezkoen liga, 33. jardunaldia
-
Reala – Real Madril (gaur, apirilak 26, 21:00)
Emakumezkoen liga, 25. jardunaldia
-
Reala – Atletico Madril (etzi, apirilak 28, 16:00)
Eskubaloia
Ohorezko maila, final-laurdenak (itzulerakoa)
- Bera Bera – Valladolid (bihar, apirilak 27, 18:00)
Saskibaloia
Gizonezkoen bigarren mailako liga, 32. jardunaldia
-
Fuenlabrada – Gipuzkoa Basket (bihar, apirilak 27, 18:30)
Emakumezkoen liga, final-laurdenetako kanporaketa (itzulerakoa)
-
Valentzia – Ibaeta Basket (etzi, apirilak 28, 18:30)
Belar hockeya
Emakumezkoen liga, 18. jardunaldia
-
Reala – Sanse Complutense (bihar, apirilak 27, 15:00)
Gizonezkoen liga, 18. jardunaldia
-
Taburiente – Donostiako Atletiko (etzi, apirilak 28, 12:30)
