Realaren historia aldatu zuen emakumezkoen taldea
Txuri-urdinek ez dute sekula ahaztuko 2019ko maiatzaren 11. Realak denboraldia borobildu zuen, Espainiako Kopako finalean ezustekoa eman eta Atletico Madril mendean hartuta.
Bost urte bete dira Realak Espainiako Kopa irabazi eta historia egin zuenetik. Txuri-urdinek ez zuten titulurik irabazten 1987tik, gizonen taldeak kopa altxatu zuenetik. Emakumeen taldeak hautsi zuen hiru hamarkada baino gehiagoko agorraldia, eta zale askorentzat euren lehenengo titulua izan zen. Garaipen historiko hori oroitzeko, Irutxuloko Hitzak txapeldunen erretilua egin zuen, eta ale guztiak agortu ziren. Eskuratu zuenak presente izango du egunotan.
Mugarria ezarri zuen taldeak denboraldi bikaina egin zuen 2019an, eta ilusioz beterik iritsi ziren Los Carmenes estadiora, Atletico Madrilen aurkako kopako finala jokatzeko. Urte hartako maiatzaren 11n izan zen, eta ez zen batere partida erraza izan. Atletico Madril markagailuan aurreratu bazen ere, Kiana Palaciosek berdindu zuen neurketa. Ordutik, partida zaila izan zen, bi taldeek izan baitzituzten garaipena lortzeko aukerak, baina, 60. minutuan, Nahikari Garciaren gol batek erabaki zuen finala. Aldiz, Sandra Ramajo kapitainak altxatu zuen kopa. Bi egun geroago, harrera paregabea egin zion hiriak talde txapeldunari egun osoan zehar, eta arratsaldean Anoetan egin zieten harrera milaka zalek.
Realeko nesken historiako lehen kopa irabazi zuten jokalarien artetik, soilik hiruk jarraitzen dute: Nerea Eizagirrek, Ane Etxezarretak eta Elene Letek. Bigarrenez kopa altxatzeko gai izango ote dira? Bihar jakingo dugu.