Gipuzkoa Basketek bosgarren partida behartu du
Donostiako saskibaloi taldeak Tizona Burgosi irabazi dio kanporaketako laugarren partida, Illunben.
Gipuzkoa Basketeko jokalariak garaipena ospatzen, Illunben.Oscar Araujo 
Bazekiten ez zela erraza izango, eta helburu bakarra da ACB ligara igotzeko lehian ahalik eta urrutien iristea. Gipuzkoa Basketek arerio gogorra du final-laurdenetan, baina hortzak erakutsi dizkiote Tizona Burgosi orain arte jokaturiko lau partidetan. Lehena Burgosek irabazi zuen eta bigarrena Gipuzkoa Basketek. Iragan asteburuan ere gauza bera gertatu zen. Larunbateko hirugarren neurketa Burgosek irabazi zuen Illunben (77-87), baina atzoko laugarrena, Gipuzkoa Basketek (82-79). Horiek horrela, bosgarren partidan erabakiko da zeinek egingo duen aurrera kanporaketetan.
Futbolean, Realeko mutilek bukaera tristea eman zioten ligari. Etxean eta milaka zaleren aurrean, galdu egin zuten Atletico Madrilen aurka (0-2). Txuri-urdinek aukerak izan zituzten partida orekatzeko, baina erasoan ez zuten asmatu eta atzean huts nabarmenak egin zituzten. Helburuak beteta eta ezer jokoan, seguru zaleek taldeari barkatu ziotela etxeko azken porrota. Izan ere, Anoetan jokaturiko partiden denboraldia ez da oso ona izan. Nolanahi ere, seigarren tokian bukatu du Realak eta Europa Ligarako sailkatu da. Liga bukatu arren, ez dute atsedenik hartuko, eta taldea dagoeneko Japonian dago hango bira berezia aurrera eramateko. Konpromiso komertzialen izenean lehiatzen jarraitu beharko dute.
Neskek ere galdu egin zuten, baina Zubietan. Kopako porrotaren zamarekin jarraitzen dute txuri-urdinek, eta ez ziren gai izan Real Madril gainditzeko (1-2). Markagailuan aurretik jarri ziren espainiarrak, eta Cecilia Marcos donostiarrak sarturiko golak berdinketarako aukerak sortu zituen arren, ez zuten lortu. Bi neurketa geratzen dira emakumezkoen liga bukatzeko, eta badirudi hori dela txuri-urdinek behar dutena.
Eskubaloian, Bera Bera taldeak ligako titulurako finala jokatuko du, eta lehen partida etzi izango dute, Gaskan, 19:30ean. Aurrez aurre, arerio ezagun bat: Elx. Etxeko lanak ondo betetzen badituzte, garaikurra eskuratzeko urratsa egingo dute.
EMAITZAK
Saskibaloia
Gizonezkoen bigarren mailako liga, final-laurdenak
- 3. partida: Gipuzkoa Basket 77 – Tizona Burgos 87
- 4. partida: Gipuzkoa Basket 82 – Tizona Burgos 79
Futbola
Gizonezkoen liga, 38. jardunaldia
- Reala 0 — Atletico Madril 2
Emakumezkoen liga, 28. jardunaldia
- Reala 1 — Real Madril 2
