Hogei film, erakusketa bat, solasaldiak eta zuzeneko emanaldiak
17. Dock of the Bay musika dokumentalaren Donostiako zinema jaialdiaren egitaraua aurkeztu dute.
Dock of the Bay jaialdiaren aurkezpena, Trueba zinema aretoan. 
Ekainaren 17tik 22ra egingo dute hamazazpigarren Dock Of the Bay jaialdia. Aldiz, gaur goizean aurkeztu dute programazioa Trueba zinema aretoan. Guztira, hogei film eskainiko dituzte —hamahiru luze eta zazpi labur—, eta horietako hainbat estreinaldiak dira. Emanaldiak eta saioak Trueba zinematan, Tabakaleran, Antzoki Zaharrean eta hiriko beste gune batzuetan izango dira: Le Bukowskin eta Santa Teresa komentuan.
Film luzeen sail ofizialean zortzi lan lehiatuko dira: Teaches of Peaches, Naturalesa morta, la història de Sexy Sadie, This is a Film About The Black Keys, Fernanda y Bernarda, Omar and Cedric: If This Ever Gets Weird, Generación Lagartija, GUT eta Mogwai: If The Stars Had A Sound. Film laburren kasuan, zazpi dira emango dituztenak: Punkaren beste aldea, El camino del ruido, Un punk ejemplar, If the clouds fall, Ressonàncies (d’una música callada), Barranco, el regreso de la Filoxera eta Good For The Soul.
Bestalde, urtero moduan, nazioarteko musika dokumentalik nabarmenen aukeraketa bat egiten du Perfect Day lehiaz kanpoko atalak. Aurten, bi lan eskainiko dituzte: Bad like Brooklyn Dancehall eta Diego Vasallo, La Posteridad Para Más Tarde.
Atal paraleloak
Dock of the Bay jaialdiaren egitaraua atal paraleloek osatuko dute: Dock Live! Kontzertuek, Kokoshca eta Diego Vasalloren emanaldiek eta Dock of the Bay solasaldiek: Lo itxurak egiten ari zinen bitartean esan nizuna eta Zer-nola eragin du digitalak zinema dokumentalaren kritikaren birkonfigurazioan?
Berrikuntza gisa, aurten Janela, leiho ireki bat Gorka Urbizuren sormen unibertsoari buruzko erakusketa bat antolatu dute. Musikariaren Hasiera bat bakarkako lehen diskoaren sorkuntza prozesuari eta lehen emanaldiei zabaldutako leiho txiki bat da. Erakusketak Ibai Arrietaren argazkiak eta Alexander Cabeza Trigg zinemagilearen ikus-entzunezko batzuk biltzen ditu, baita Kaier bat liburua eta Hasiera bat diskoa ere.
