Altxalili kolektiboari eman dio EHGAMek Urrezko Hirukia
EHGAMeko eta Altxaliliko kideak, Teila Frabrikan egindako ekitaldian.Xalba Ramirez 
EHGAM, sexu askapenerako erakundeak, Urrezko Hirukia banatzen du urtero, eta aurten Altxalili kolektiboari eman diote: “LGTBI eta queer errealtateei Ipar Euskal Herriko barnealdean ikusgarritasuna eta erreferentzialtasuna emateko egin duen lan apartagatik”.
Iazko urtarrilean Atharratzeko Prefosta elkartearen ostatuan abiatu zenetik, hamaika emanaldi egin ditu Altxalili kabaretak, “euskalduntasun queer baten imajinarioak berritzen”.
Horretaz gain, EHGAMeko Ibon Egañak nabarmendu duenez, egiten duten ikuskizunaz gain, kolektiboak egindako “lan militantea” goraipatu nahi dute: “Ipar Euskal Herriko barnealdeko LGTBIQ+ errealitateak bistaratzen egindako ekarpena. Herri txikietako karrikak hartuz. Sexu eta genero ez-normatiboak dituzten barnealdeko pertsonen bizitzak bizigarriago eta arnasgarriago egiteko egindako lana”.
EHGAMeko eta Altxaliliko kideak, Teila Frabrikan egindako ekitaldian.
Altxaliliko kideek “biziki” eskertu dute saria. “Erasoak ugaritu egin dira, Saran, Baigorrin eta abar… Den egoera politikoarekin erasoen jomuga gara, eta honelako errekonozimendu batek ematen digu halako berotasun bat bihotzean… zinez eskertzen dugu”.
“Milesqueer” esanez eskertu dute errekonozimendua, eta aurrerantzean EHGAMekin harremana indartzeko gogoa erakutsi dute: “Garai honetan on egiten du, zuen babesak, elkartasunak eta sostenguak. Eta datorren urteotan batak bestaren beharra ukanen dugu”.
