Bera Berak harrotasuna aldarrikatu du bazkide berriak lortzeko
Bera Bera eskubaloi taldeak abonu kanpaina aurkeztu du.Bera Bera 
Gutaz harro lelopean, 2024-2025 abonamendu kanpaina abiatu du Bera Bera eskubaloi taldeak. “Gure zaletasunak adierazi digunari buruzko kanpaina eraiki dugu, maiatza bizi baten ondoren. Koparen eta titulurako kanporaketen artean, Bera Bera zale gisa harro egoteko arrazoia dela sentitu eta ikusarazi digute”, adierazi du Tati Garmendia kirol zuzendariak.
Bazkide gehiago lortzeko deia luzatu dute, hazten jarraitzeko. “Ideia hori aldarrikatu nahi dugu. Zu ere Bera Bera zara, eta gainditzen lagunduko digun masa sozial hori handitu nahi dugu, hobetzen jarraitu nahi dugulako eta beste maila batzuk lortu nahi ditugulako”, nabarmendu du Garmendiak.
Datorren denboraldiari dagokionez, ohorezko mailako liga erregularrak 26 jardunaldi izango ditu —talde gehiago izango direlako; hamalau—. Ondorioz, Berak berak helduentzako abonua 89 eurotan jarri du. Gazteena (14 urtera arte) eta erretiratuena, berriz, 52 eurotan. Berrituz gero, 85 euro eta 49 euro ordainduko dute egungo abonatuek.
Horren truke, liga erregularreko hamahiru partida eta kanporaketetako final-laurdenetako partida ikusi ahal izango dituzte. Finalaurrekoetan eta finalaurrekoetan, sarreraren prezioaren %50eko deskontua izango dute, eta irizpide hori Europako partidetan ere aplikatuko da.
Polemika, sareetan
Kanpainak zer esana eman du sare sozialetan, klubak Athleticek irabazitako koparen ospakizuna erabili duelako. Hain zuzen ere, gabarraren irudi bat erabiltzeagatik haserre agertu dira batzuk. Klubak ez du horren inguruko adierazpenik egin, momentuz.
