Pilota pasatzeaz
![hondartza](https://irutxulo.hitza.eus/site/files/2024/07/irutxuloko-hitza-2024-07-26_4_302775_1.jpg)
Irakurle estimatuok:
2.412. ale honekin, udako oporretara goaz. Pozik aritu gara astez aste zuentzat Donostiako gairik mamitsuenak bilatzen, albiste, elkarrizketa eta erreportaje interesgarriak janzten saiatzeko. Espero dugu gure lana ondo bete izana, eta zuek ere pozik geratu izana gure zereginarekin. Sentsazio horrekin, bagoaz, abuztu amaierara arte. Ordea, ez zarete Irutxuloko Hitzarik gabe geratuko. Baliteke gure ale guztiak ikasturtean zehar irakurri ez izana —denok ere lanpetuta bizi baikara egunerokotasunaren zurrunbiloan—. Bada, falta zaizkizuen aldizkari horiek hartu, eta oporretan patxadaz irakurtzea proposatzen dizuegu, hondartzan, igerilekuan, mendian, edo dena delakoan. Zuen teilatuan dago pilota orain.
Eta berriro diot ez zaretela geratuko Irutxuloko Hitzarik gabe, astekaria argitaratuko ez badugu ere, webguneak martxan jarraituko duelako egunero, ohiko moduan. Bide batez, doazkiela gure animo guztiak abuztuan lanean egongo diren langile finei, zuen teilatuan ere badago pilota orain.