EH Bilduk hainbat zuzenketa proposatu dizkio Udal Gobernuaren Zerga eta Tasa proiektuari
Gaur aurkeztu dituzte proposatutako ponentziaren xehetasunak.EH Bildu 
Zortzi zuzenketa eta bederatzi arau proposamen aurkeztu dizkio EH Bilduk udalaren Tasa eta Zergen proiektuari, zerbitzu publikoen kalitateari eta progresibotasunari eusteko asmoz, eta horretarako ponentzia bat sortzea proposatu dute. Gaur aurkeztu dituzte Juan Karlos Izagirre EH Bilduren udal taldeko bozeramaileak eta Jabi Vitoria zinegotziak ponentzia horren xehetasunak. Iazko zerga eta tasetan “igoera handiak” egon direla adierazi dute, eta horri aurre egiteko sortu nahi dute ponentzia: “Tasaren gorakada kontuan hartzea planteatzen dugu, gaikako bilketa hobetzeko eman beharreko urrats beharrezko eta eraginkorrak emanez”.
Kalitatezko zerbitzu publikoak eguneratzea eta ahalegin fiskalak banatuz pertsonei lehentasuna ematea dira, besteak beste, proposamen horiekin lortu nahi dituzten helburuak. Ahalegin fiskala Donostiako familiengan jarri nahi du udalak, eta, beren ustez, hori zuzendu beharko litzateke, Ondasun Higiezinen Gaineko Zerga (OHZ) berriro handitzeko: “Zailtasun ekonomiko gehien jasaten ari direnek politika fiskal horiei lasaiago aurre egiteko aukera izan behar dute”.
OHZ eta terrazak
OHZri dagokionez, %1,5era eguneratzea proposatzen du EH Bilduk, udalak zerga %3,9 igotzea proposatzen duen bitartean. Zerga hori donostiarren etxeko ekonomian “eragin orokorra” duen zerga bat da, eta, euren ustez, beharrezkoa da zerga horretan ahalegin fiskala murriztea. “Modu arduratsuan jokatzen dugu horrela”, adierazi du koalizioak.
Gainera, OHZren kuotaren hobariak ezartzeko katastro balioa kontuan hartu beharko litzatekela uste dute. Hala, familia ugariek OHZren kuotaren hobaria jasotzen jarraituko lukete, 300.000 euroko katastro balioa gaindituko balu.
Udalak lurzorua okupatzeagatik ordaindu beharreko tasa proposatu zuen bere garaian eta, horren aurrean, %1,5eko igoerarekin eguneratzea proposatzen du EH Bilduk; hau da, terrazek hartzen duten azaleraren arabera tasa bat edo beste aplikatzea.
Ura, saneamendua eta zaborra, oinarrizkoak
Iaz progresibitatean oinarritutako proposamenak egin zituen EH Bilduk ura eta zaborraren gisako oinarrizko zerbitzuen tasetan, eta Udal Gobernuak baztertu egin zizkion. Oraingoan, “berriro saiatuko direla” adierazi dute. “% 3,9ko igoera orokortua gehiegizkoa da”, adierazi du Izagirrek.
Beren ustez, testuinguruak “araudia eguneratzea” eskatzen du. Hortaz, hobari desberdinak proposatzen dituzte ur tasan, errentaren arabera: %80, %65 eta %40koak. Hazten joango dira, bizikidetza unitateko kideen arabera.
Saneamenduari dagokionez, %2,87 igotzea proposatzen du udalak. EH Bilduk, ordea, %0,5 eguneratzea. Adierazi dutenez, saneamenduak lotura zuzena du uraren tasarekin, ura portzentaia batean igotzen bada, saneamenduagatik bildutakoa ere igo egingo baita.
Zaborraren zerbitzua garestitu egin da, turista kopuruaren igoerarengatik. “Bada garaia ezartzen den tasa turistikoa finalista izan dadin planteatzeko. Plus hori ez dagokie soilik donostiarrei”, salatu du Izagirrek. Zaborraren defizita 5,5 milioi eurokoa da Donostian, koalizioak adierazi duenez, eta udalak, %26,54ko igoera proposatu du defizit hori orekatzeko.
EH Bildu, ordea, ez dago ados udalaren proposamenarekin: “Irtenbidea ezin da tasa garestitzeko planteamendu batera murriztu, kostua xurgatzeko. Gastuaren esparruan ere lan egin behar da, berau murrizteko eta sortzen den defizita sortzeagatik ordaintzeko”, adierazi du Vitoriak.
Beste proposamen batzuk
TAOari dagokionez, gizarte bineta eta egoiliarren bineta izoztea da EH Bilduren proposamena, eta udatiarraren bineta %7,8 garestitzea. Horrek bat egiten du udalak ezarritako irizpideekin. Horren harira, garabia zerbitzua herritar guztiei aplikatzen zaie, eta %7,8ko igoera proposatzen dute, baita ere, hori murrizteko.
Udalak zerbitzuak emateagatik eta jarduerak egiteagatik aplikatzen den tasa garestitzea proposatu du, eguneko 7,5 eurotik 20 eurora igoz, “kostua estaltzeko”. EH Bilduk ez du igoera onartzen: “Arrisku egoerei babesa ematen dien baliabidea da; oinarrizko eskubidea eta premia larria, zoritxarrez”.
Koalizioak adierazi duenez, udalaren planteamendua “erredukzionista eta partziala” da, ez baitu kostuen murrizketan esku hartzen.
