'Atxurrak' gorago altxatzeko gogotsu daude
Realeko belar hockey taldeak ohorezko mailako lehen partida jokatuko du etzi, Bartzelonaren zelaian.
Realeko belar hockey taldea prest dago denboraldia hasteko.Reala 
Liga erregularra nabarmen indartuta hasiko du Realeko belar hockey taldeak. Bartzelona igo berriaren kontra jokatuko dute etzi ohorezko mailako lehendabiziko partida, Pau Negre zelaian (12:30). Txuri-urdinek kalitatezko hiru fitxaketa egin dituzte: Eugenia Trinchinetti eta Sofia Toccalino argentinarrak —Parisko Olinpiar Jokoetan brontzezko domina irabazi dutenak— eta Sara Puglisi italiarra. Denboraldiaurre ona egin ondoren, garaipenarekin hasi nahi dute ligan, eta beraien helburua sailkapenaren erdian edo goialdian finkatzea da.
Eskubaloian, 2024-2025 denboraldiko taldea aurkeztu berritan, Bera Berak sasoiko lehen partida jokatuko du bihar, Gaska kiroldegian (17:30). Valladolid izango dute aurrez aurre, partidak ondo lehiatzen dakiena. Lehen jardunaldian aise irabazita, bigarren partida jarraian irabazten ahaleginduko dira.
Futbolean, Realeko bi taldeek erronka gisa hartu beharko dituzte neurketak. Emakumezkoek Bartzelonaren zelaian jokatuko dute gaur (20:00). Gezurra badirudi ere, ez dira sailkapeneko liderrak, baina Deportivori erraz irabazi zioten lehen jardunaldian. Txuri-urdinek, berriz, galdu egin zuten Sevillaren kontra (3-2), eta atzeko lerroan egindako akatsak ahazteko partida zailena egokitu zaie. Aldiz, gizonezkoek Real Madril hartuko dute bihar, Anoetan (21:00). Gainera, kamiseta berezi batekin ariko dira txuri-urdinak. Omenaldiez harago, hiru puntuak premiazkoak dira, eta etxeko lehen partida irabaztea, orain arteko biak galdu ondoren. Ez dute aurkari errazena izango, baina ligaren etena gaindituta, Realak bertsiorik onena berreskuratu beharko du.
PARTIDA
Eskubaloia
Emakumezkoen ohorezko maila, 2. jardunaldia
- Bera Bera – Valladolid (bihar, larunbata, 17:30)
Futbola
Emakumezkoen liga, 2. jardunaldia
- Bartzelona – Reala (gaur, ostirala, 20:00)
Gizonezkoen liga, 5. jardunaldia
- Reala – Real Madril (bihar, larunbata, 21:00)
Belar hockeya
Emakumezkoen ohorezko maila, 1. jardunaldia
- Bartzelona – Reala (etzi, igandea, 12:30)
