Aintzane Pujanaren hilketaren epaiketa hasi dute
Aintzane Pujanaren hilketa matxista salatzeko elkarretaratzea, Bulebarrean. 
Aintzane Pujana 32 urteko emakume donostiarra 2021eko urtarrilaren hasieran atxiki, sexualki esplotatu eta hil zuten. Haren gorpua urtarrilaren 4ean aurkitu zuten Aizarnazabalen (Gipuzkoan), ibaiaren ertzean. Urtarrilaren 13an, Ertzaintzak Errenteriako (Gipuzkoako) 24 eta 23 urteko bi herritar atxilotu zituen. Pujana hil izana leporatzen diete.
Hiru urte luzeren ondoren, hilketa matxista argitzeko epaiketa hasi dute, Berria egunkariak jakitera eman duenez. Epaimahaia bederatzi titularrek eta bi ordezkok osatu dute. Gipuzkoako Fiskaltzak espetxealdi iraunkor berrikusgarria eskatzen du hilketagatik, bost urteko kartzela zigorra Pujana legez kanpo atxikitzeagatik, eta hiru urte eta sei hilabetekoa sexualki esplotatzeagatik. Lehenbiziko aldia da Gipuzkoako Fiskaltzak espetxealdi iraunkor berrikusgarria eskatzen duena.
Orduan egindako ikerketaren arabera, labankadaz hil zuten Pujana, urtarrilaren 2ko goizaldean izandako liskar gogor batean. Gorpua, baina, hilaren 4an agertu zen, Aizarnazabalgo Etxabe auzoan. Urola ibaiaren ertzean garbiketa egiten ari ziren langile batzuek topatu zuten. Hala ere, biktimaren bikotekideak urtarrilaren 1ean jarri zuen haren desagerpenari buruzko salaketa, eta Polizia biktimaren azken egunak eta orduak ikertzen aritu zen orduz geroztik. Gorpuari autopsia egin zioten Donostian, Auzitegi Medikuntzako Euskal Institutuan.
Elkarrekin bizi ziren bi atxilotuak eta Pujana, Aizarnazabalgo landetxe bateko apartamentu batean. Ikerketak erakutsi zuenez, gorpua ibai ondoan utzi eta gero, Gipuzkoan zehar ibili zen bikotea, frogak ezkutatzeko. Etxea ere goitik behera garbitu zuten, delituaren zantzuak ezabatzeko.
