Groseko zaldiko-maldikoa itxi dute, 115 urteren ostean
Groseko zaldiko-maldikoa.Donostia Turismoa 
Groseko Zuberoa plazako Txuri Urdin zaldiko-maldikoa itxi dute, 115 urtez biraka aritu ostean. 1900 eta 1910 artean eraiki zuten, eta hasiera batean elektrizitaterik ez zuenez, langile batek eskuz birarazi behar izaten zuen.
Hain zuzen ere, 1940an jarri zioten potentzia handiko motorra, eta abiadura horzdun kutxa baten bidez aldatzen zuten. Azkenik, 2008an, erabat zaharberritu zuten teknologia berriekin, eta Donostiarako pertsonalizatu zuten. Horrela, bada, eskuz margotuta dago, eta mendearen hasierako hiriko argazki zaharretatik ateratako ilustrazioak ikus zitezkeen bertan.
Patxi Vizcaino jabeak saldu egin behar izan du zaldiko-maldikoa, udalak ez baitio kontratua luzatu. Hain zuzen ere, udalak azaldu du Tokiko Gobernu Batzarrak, 2023ko abuztuaren 9ko lan bileran, hamargarren eta azken luzapena onartu zuela 2023ko urriaren 11tik 2024ko urriaren 10era bitartean. Lehenengo esleipena, urtez urte luzatzen joan dena, 2013an egin zen. Udaleko iturrien arabera, karruselaren titularrak bazekien noiz amaitzen zen behin betiko esleipena, eta hala adierazi du Vizcainok berak ere.
Horrenbestez, belle époque garaiko zaldiko-maldiko bakarra geratzen da Donostian, Alderdi Ederrekoa, hain zuzen ere.
