Herria tabernaren 40. urteurrena ospatuko dute larunbatean
'40 urtez herria eginez' lelopean, ospakizun jarduerak izango dituzte eguerditik iluntzera arte, eta jana, edana, musika eta dantza ez dira faltatuko.
Parte Zaharreko Herria taberna. 
40 urte ez dira egunero betetzen eta, horrenbestez, gogotik ospatu behar dute Herria tabernaren urtemuga. Ikatz kaleko tabernak egun osoko egitaraua antolatu du Parte Zaharrean. Larunbat eguerdian abiatuko dituzte ospakizunak, eta iluntzera arte, jana, edana, musika eta dantza ez dira faltatuko.
Joaldunek iragarriko dute Parte Zaharreko tabernaren festa giroa. 12:00etan abiatuko dira buruhandiekin eta erraldoiekin batera, Zuloaga plazatik. Kaleak girotu ondoren, presoen aldeko kontzentrazioa egingo dute Bretxan (12:30), eta aldarrikapenei, dantzak emango die segida, ordu batean, Muxikoak dantzatuko baitituzte Plaza Berrian. Horren ondotik, 40 urteak ospatzeko topa egingo dute Herria tabernan (13:30), eta bazkaria egingo dute Trinitate plazan.
Bazkariaren bueltan, halaber, ekitaldi musikatuak antolatu dituzte. Bertsoez gain, txarangaren erritmoak mantenduko du jai giroa plazan bertan. Iluntzerako, berriz, Herria tabernara lekualdatuko dira, Elene eta Anuk abeslarien kontzertuaz gozatzeko.
Sare sozialetan zabaldutako afixean iragarri dutenez, bazkariko txartelak Herria tabernan daude eskuragarri eta erreserbak egin nahi dituztenek, 658 60 80 43 Whatsapp zenbakira idatzi beharko dute.
