Iker Munduateren 'Argi Zantzuak' disko instrumentala kalean da
Iker Munduate gazte donostiarrak Argi Zantzuak diskoa argitaratu du Hegoa Diskak Londresko argitaletxearen eskutik. Ambient estiloko hamabi pieza oniriko eta lasai bildu ditu, naturari keinu egiten dien lan honetan.
Japoniako eta Espainiako 1980ko hamarkadako ambient eta new age-en oihartzuna dauka Munduateren lanak: “Hiroshi Yoshimura, Finis Africae, Suso Saiz edo Fumio Miyashitaren jarraitzaileak gustura egongo dira hemen”, diskoetxearen oharraren arabera. Azaldu dutenez, “egitura sotilez eta eduki harmoniko lasaigarriz beteta, musikak bat egiten du eguneroko bizitzako ereduekin, eta dagoeneko badagoen paisaia familiarraren barruan laguntzen digu. Beraz, disko hau bozgorailuetan entzutea gomendatzen da, gure inguruan dauden soinuekin nahas dadin”.
Hiriko saltsetan murgildua
Iker Munduate Thusberg Donostian jaio eta hazitako multinstrumentista da, Finlandian Mikkelirekin lotura estua duena, Munduateren familiaren erdia bertakoa baita. Bilboko EHUko Arte Ederretako ikaslea da, eta soinuarekiko, artearekiko eta diseinuarekiko duen interesak diziplina horiek guztiak uztartzera eta bere musikari eta lanari transmititzera eraman du (LPko azala Ikerrek berak diseinatu du).
Ekoizpen eta konposizio ikuspegi minimalistekin esperimentatuz hainbat zinta eta EP autoeditatu ondoren, Argi Zantzuak Munduateren bakarkako lehen albuma da, eta aldaketa handia dakar bere aurreko argitalpenekin alderatuta. Aurretik, aktiboki parte hartu du Azkar Zintak (punk/emo/hardcore zinten zigilua) lanaren kudeaketan, Tenpera eta Comic Sans taldeetan joz (biak zigiluaren estilo berarekin lerrokatuak) eta Free Jazz/Improv & Noiseren tokiko eszenan parte hartuz bateria gisa. Donostiako underground eszenan parte hartzeaz gain (Distopia Mutante, Kontenedora…), Bilboko MEM arte esperimentaleko nazioarteko jaialdian eta Hendaiako Nokodek bideokreazio eta soinu-esperimentazioko hitzaldian ere aritu da
