Bruce Springsteenek bigarren kontzertu bat eskainiko du Anoetan
Bruce Springsteen & The E Street Band taldeak Anoetan eskaini zuen bigarren kontzertua, 2012ko ekainaren 2an.Gorka Bravo 
Joan den astean iragarritako kontzertuak sortutako ikusminaren ostean, Bruce Springsteen The Boss musikari ospetsuak bigarren kontzertu bat iragarri du Anoeta estadioan, bere E Street Band taldearekin. Ekainaren 21eko (larunbata) kontzertua iragarri zuten joan den astean, eta ekainaren 24rako (asteartea) baieztatu dute bigarrena. Bi emanaldien sarrerak gaur, hilak 8, jarri dituzte salgai, Doctormusic.com eta Entradas.com atarietan, 70 eta 140 euro bitarteko prezioetan. Bitxikeria gisa, Springsteenek jo baino astebete lehenago, Fermin Muguruzak joko du Anoetan, eta artista irundarrak sare sozialetan gogorarazi duen moduan, prezioen arteko aldea nabarmena da, 39 euroan erosi baitaitezke Muguruzaren sarrerak.
Donostia – Anoeta Estadioa 2025 – Reale Arena
— Fermin Muguruza (@muguruzafm) October 7, 2024
-Ekainak 14: @muguruzafm
🎟️ sarrera 39€. Ireki behar bada goiko harmaila 35€.
-Ekainak 21: @springsteen
🎟️ sarrera 140€ (aurreko pista), 88€ (atzeko pista). Harmailak 140€, 108€, 94€, 84€ eta 70€.#AitorZabaletaBetiGogoan pic.twitter.com/x7oOTln6wV
Abuztuaren erdialdean, Noticias de Gipuzkoa egunkariak jakinarazi zuen Springsteenek bi kontzertu emango zituela Donostian, baina Get In enpresak, Springsteenen emanaldiaren promotoreak, gezurtatu egin zuen egunkariak argitaraturikoa. Ordea, joan den astean baieztatu zuten Anoetan kontzertu bat eskainiko zuela taldeak, eta orain baieztatu da bigarrena. Abuztuan berria eman zuen Harri X. Fernandez kazetariak sare sozialetan salatu du Get In enpresaren jarrera: “Springsteenek bi aldiz joko du Donostian. Hori da gelditzen zaidana, milioiak tarteko dituzten operazioetara ohituta dagoen promotore batek, aipua kentzeko asmoz, publikoki seinalatu ostean”.
Hamabi kontzertu emango dituzte 2025eko biraren barruan: Manchesterren (maiatzak 17 eta 20), Lillen (maiatzak 24), Marsellan (maiatzak 31), Liverpoolen (ekainak 4), Berlinen (ekainak 11), Pragan (ekainak 15), Frankfurten (ekainak 18), Donostian (ekainak 21), Gelsenkirchenen (ekainak 27) eta Milanen (ekainak 30 eta uztailak 3). Bruce Springsteen & The E Street Band laugarren aldiz arituko da Anoetan ekainean: 2008an, 2012an eta 2016an izan ziren Anoetan.
