'Zorretan' antzezlana eskainiko du Gazteszenak ostiralean eta larunbatean
Hika Teatroa konpainiaren Zorretan antzezlana ikusteko aukera izango da Gazteszenan, ostiralean eta larunbatean. Bi egunetan, 19:30ean hasiko da emanaldia, eta sarrerak salgai daude Donostia Kulturaren webgunean.
Agurtzane Intxaurragaren zuzendaritzapean, Miren Gaztañaga, Mikel Losada eta Iñake Irastorza aktoreak dira Zorretan antzezlaneko aktoreak. Honela dio laburpenak:
Emakumea eta gizona bikote dira aspalditik. Gaur emakumea aztoratuta iritsi da etxera. Amarekin telefonoz hitz egin du eta beraiekin bizitzera datorrela ulertu dio. Uste du hori dela bere egonezinaren arrazoi eta etxera iristean, gizonari kontuak eskatzen hasiko zaio. Hau ere ez dago bere onenean, ordea. Egun handietarako erabiltzen duen gorbata berdea aurkitzen saiatzen ari da eta urduri dago. Are urduriago emakumeak berea den pijama soinean duela jantzita ikustean. Joan egin behar du, baina ezerk ez dirudi lekuan. Etxea aldrebestuta izateaz gain, badirudi bizitza dela aldrebestu zaiena. Emakumea normaltasunera itzultzeko borrokan ari da, baina lur azpian hondoratzen ari dela sentitzen du eta eusteko moduan daukan esku bakarra amarena omen. Emakumeak, ez du nahi eta uko egiten dio hori horrela izateari. Nahiago lur azpian bizi azal lodiko sator bihurtuta amarekin baino.
Kontakizunean zehar, egoera komikoak, absurdoak edo surrealistak txandatuz ibiliko dira aktoreak, pertsonaien iraganaren, orainaren edo etorkizunaren artean biziko den narrazio hautsia eraikiz.
