Realak ez dizkie sarrerak salduko Amsterdameko Ajax taldeko zaleei
Anderlecht taldeko ultrak Anoetara bidean. Linas Korta 
Realak erabaki du Amsterdameko Ajax futbol taldeko zaleei sarrerarik ez saltzea azaroaren 28an Anoetan jokatuko den partidarako. Realak atzo hartu zuen erabakia, eta Ajaxek ohar batean azaldu zuenez, “ezusteko oso desatsegina” hartu zuen, Realak Ajaxeko zaleei sarrerarik ez emateko asmoa duela iragarri ostean. Hori dela eta, Holandako taldeak UEFAren bitartekaritzara jo du, eta UEFAren azken erabakiaren zain dagoela iragarri zuen.
Azken asteetan, Ajaxek hainbat bilera izan ditu UEFArekin, Realarekin eta bertako agintariekin partida antolatzeko. “Elkarrizketa horietatik ondorioztatu zen, besteak beste, Realak eta hiriak hainbat esperientzia negatibo izan dituztela atzerriko beste klub batzuetako zaleen aurreko bisitekin. Ajax orain ondorioak ordaintzen ari dela dirudi”, adierazi zuen Holandako klubak.
Realak, bere aldetik, hilabete honen hasieran Anderlecht talde belgikarraren zaleek Donostian izandako istiluak saihestu nahi ditu. Izan ere, partida horren lehen zatian, partida minutu batzuetan eten egin behar izan zuten, ultren indarkeriaren erruz; segurtasun pantaila bat hautsi eta besaulkiak jaurti zizkieten belgikarrek euskal jarraitzaileei.
Ondorioz, bost pertsona atxilotu zituzten, autoritatearen aurkako atentatua, desordena publikoak, kalteak eta agenteei aurre egitea egotzita. UEFAk, berriz, Anderlecht zigortu zuen, eta debekatu egin zion bere zaleei sarrerak saltzea etxean jokatutako hiru partidatan.
Herbeheretako zaleak, gehiagotan zigortuta
Ez da atzerriko agintariek Herbehereetako zaleei betoa jartzen dien lehen aldia. Duela bi aste, Eindhoveneko PSVko jarraitzaileei sarrera debekatu zieten Paris Saint-Germain taldearen aurkako Txapeldunen Ligako Pariseko partiduan, eta iragan denboraldian, Rotterdameko Feyenoord taldeko jarraitzaileak ere ez zituen onartu Erromak.
