Etxegabetzear dauden bi pertsonaren egoera salatuko du Kaleratzeak Stopek ostegunean
Kaleratzeak Stopek antolaturiko prentsaurreko bat, Bulebarrean.Aitor Odriozola 
Kaleratzeak Stopek elkarretaratzera deitu du ostegun honetan, Donostian aldi baterako alokairuko geletatik kaleratuko dituzten bi pertsonari elkartasuna adierazteko. Bulebarrean elkartuko dira, 11:00etan.
Elkarteak jakinarazi duenez, Javierrek eta Fernandok, beste maizter kaltebera batzuek bezala, ezin dute sukalde eskubidea duten logeletan baino bizi, Estatuko Etxebizitzaren Legeak arautzen ez dituen urte bateko edo biko kontratuekin. “Donostian, gaur egun, hilean 600 euro arteko alokairuak ordaintzen ari dira gela bakoitzeko”, salatu du Kaleratzeak Stopek.
Hain zuzen ere, Javier (57 urte, baliabiderik gabe) eta Fernando (72 urte, Diru-sarrerak Bermatzeko Errentarekin batera kotizazio gabeko pentsio bat jasotzen duena) sukalde eskubidea duten geletatik kaleratzear daude, aldi baterako kontratuak amaitu zaizkielako.
Javierrena apirilaren 1ean amaitutako hitzezko kontratua da, eta Fernandorena, bi urtekoa, urriaren 9an. Biak logelako etxebizitzan erroldatuta daude, ahultasun egoeran daude eta Groseko eta Alde Zaharreko gizarte zerbitzuek artatzen dituzte, hurrenez hurren. Zerbitzu horietan, maizter gehiagorekin elkarbanatzen dituzte logelak. Kaleratzeak Stopek baieztatu duenez, biak prentsaurrekoan izango dira.
“Prentsaurrekoan, Estatuko Etxebizitza Legeak arautzen ez dituen lege iruzurreko aldi baterako kontratuak sinatzera behartuta dauden maizter horien babesgabetasuna salatzen jarraituko dugu, bai eta edukitzaile handiek eta partikularrek ere, aldi baterako kontratuak masiboki erabiltzen dituztela, 5-7 urteko kontratu egonkor eta arautuak eskaini beharrean”, nabarmendu dute.
