Anoeta berreskuratu dute
Realeko neskek Athleticen kontrako euskal derbia irabazi dute, Lavogezen gol eder bati esker (1-0).
Realeko neskak euskal derbiko garaipena ospatzen, Anoeta zelaian.Reala 
Anoeta futbol zelaiak emakumezkoen futbol partida gehiago hartu beharko lituzke. Euskal derbietan giro polita sortzen den arren, badira beste partida erakargarri batzuk. Atzoko giro aparta da eredu, eta, batez ere, lorturiko emaitza. Realak Athletic hartu zuen mendean, Lavogezen gol eder bati esker (1-0). Iaz ez bezala, aurten hiru puntuak etxean geratu ziren.
Gol aukera garbiak izan zituzten arren, bakarra egitea lortu zuten txuri-urdinek. Zuri-gorriek, berriz, bat gutxiagorekin jokatu zuen bigarren zati osoa, eta horrela ere, estu hartu zuten Reala. Zorionez, zuri-gorriek ez zuten Elene Leteren ate aurrean asmatu. Realak laugarren jarraitzen du sailkapen nagusian 19 punturekin, eta atzetik dituenekiko aldea handitu du.
Eskubaloian, Bera Berak Europa ligako multzoen fasea jokatuko du, azken kanporaketa irauli ondoren. Donostiarrek sei goleko aldearekin gainditu zuten atzo Lublin talde poloniarra, Gaska kiroldegian (26-20). Arerioak lau goleko abantaila zuen, baina ezin izan zuen baliatu Bera Bera erasokor eta indartsu baten aurka.
Izotz hockeyan, Txuri Urdineko neskek agerian utzi dute galdu zuten partida bakarra egun txar baten ondorio izan zela. Asteburuan sentsaziorik onenak berreskuratu zituzten Logroñon, eta aise irabazi zioten Milenio Panthersi (4-15).
Belar hockeyan, Realak garaipen garrantzitsua eskuratu zuen Terrassaren zelaian (1-2). Egindako lan onaren saria izan zen. Sara Puglisik penalti korner baten bidez eta Federica Cartak egin zituzten txuri-urdinen golak. Bigarrena, neurketa bukatzeko bi minutu falta zirenean.
Saskibaloian, Gipuzkoa Basketek amore eman behar izan zuen berriz ere Illunben. Partida txarra jokatu ez bazuten ere, ez ziren gai izan Fuenlabradari aurre egiteko (71-81).
EMAITZAK
Futbola
Emakumezkoen liga, 10. jardunaldia
- Reala 1 – Athletic 0
Eskubaloia
Europa ligako QR3 kanporaketa, itzulerakoa
- Bera Bera 26 – Lublin 20
Izotz hockeya
Emakumezkoen liga, 8. jardunaldia
- Milenio Panthers 4 – Txuri Urdin 15
Belar hockeya
Emakumezkoen ohorezko maila, 9. jardunaldia
- Terrassa 1 – Reala 2
Saskibaloia
Gizonezkoen bigarren mailako liga, 8. jardunaldia
- Gipuzkoa Basket 71 – Fuenlabrada 81
