Gipuzkoako 183 familia, etxerik gabe gelditzeko arriskuan
Kaleratzeak Stopek elkarretaratzea egin du Andia kalean, 183 familiaren egoera zaurgarria salatzeko.EH Bildu 
Kaleratzeak Stop plataformak elkarretaratzea egingo du gaur goizean Andia kalean, Eusko Jaurlaritzaren ordezkaritzaren aurrean, Gipuzkoako 183 maizter familiaren egoera salatzeko. Izan ere, plataformak azaldu duenez, familia horiek abenduaren 31ra arte etenda dituzte kaleratze aginduak, baina hori ahalbidetu duen dekretua ez bada luzatzen, “kalean geldituko dira, alternatibarik gabe”. Horrela, kaleratze agindua eten duen dekretua urtebetez luzatzeko eskatuko dute.
Plataformak gaineratu duenez, “Donostia, Irun eta Errenteriako udalerri tentsionatuetan bizi diren 183 familia kaltebera horien drama, errentak ez ordaintzeagatik edo kontratuak amaitzeagatik kaleratze aginduak dituztenak, biderkatu egiten da Gipuzkoako eta EAEko gainerako udalerrietan, ezin dutelako ordaindu alokairu espekulatiboen igoera, eta ezin dutelako alokairu sozialeko etxebizitza bat eskuratu Gipuzkoako alokairu publikoko parkearen defizit kronikoaren ondorioz”. Izan ere, gogorarazi dutenez, “Gipuzkoan 8.423 etxebizitza daude Etxebideren zerrendetan izena emanda duten 21.795 pertsonentzat, eta Euskadin 27.720 dira alokairu sozialeko etxebizitza baten 78.475 eskatzailerentzat”.
Horrela, erakunde publikoei eskatu diete irtenbide bat emateko 183 familia horiei, kalean gelditu ez daitezen.
