Udalaren Musika eta Dantza Eskolak bi kontzertu berezi emango ditu Gabonetan
Udalaren Musika eta Dantza Eskolako talde bat Iglu gunean, iazko Gabonetan. 
Gabonetako Azokan parte hartuko du Donostiako Udalaren Musika eta Dantza Eskolak. Bi kontzertu berezi emango dituzte; lehena, hilaren 16an, eta, bigarrena, 18an. Emanaldi horiei esker, bisitariek hainbat adinetako ikasleen musika emanaldiez gozatu ahal izango dute; izan ere, ikasleek hiruhilekoan zehar lan egin dute pieza horietan.
Aurten, Donostiako Gabonetako Azokak, Europa erdialdeko tradizioetan inspiratuta, ibilbide berezia eskaintzen du, Frantzia pasealekutik Santa Katalina plazaraino. Gabonetako postuak, dekoratuak eta sasoiko produktuez beteak izateaz gain, zuzeneko musika Gabonetako esperientziaren zati garrantzitsua izango da.
Hilaren 16ko emanaldia 19:00etan izango da, eta Plus Brass Banda Urumea pasealekuan ibiliko da, 8 eta 12 urte bitarteko 50 bat ikaslerekin. New Orleanseko taldeen estiloan, adin guztientzako pieza bizi eta eskuragarriak interpretatuko dituzte.
Hilaren 18ko kontzertua ere 19:00etan izango da, baina Iglu guneko agertokian. Udalaren Musika eta Dantza Eskolako Klarinete Ensemble Gazte eta Klarinete Ensemble Txiki taldeak ariko dira zuzenean. Maite Etxepare eta Ana Huarte irakasleen zuzendaritzapean, klarinete jotzaile gazteek jai errepertorioa interpretatuko dute.
