Ibaeta Basketek urtea ondo estreinatzeko premia dauka
Ibaeta Basketen eta Gernikaren arteko euskal derbia.Ibaeta Basket 
Beste porrot batekin eta jaitsiera postuetan bukatu zuen 2024. urtea Ibaeta Basketek. Asmatu ezinda dabiltza ligan, eta soilik lau garaipen lortu dituzte orain arte. Gernikaren aurkako euskal derbia Gaska kiroldegian galdu ondoren, beste euskal derbi bat dute zain. Gasteizko Araskiren pistan ariko dira bihar, 19:00etan. Bi taldeek launa garaipen dituzte, eta irabazten duenak zulotik ihes egiteko bidea ikusiko du. Gipuzkoa Basketek ere bihar jokatuko du Oviedon, etxeko taldearen kontra (18:30). Sailkapeneko hamargarren postuan daude gora egiteko nahiarekin eta beharrarekin.
Futbolean, Realeko bi taldeek partida zeharo desberdinak izango dituzte. Neskek Bartzelona lider sendoa hartuko dute igandean, Zubietan (13:30). Kataluniarrak gaindiezinak bihurtu dira txuri-urdinentzat, eta inoizko partidarik onena egin beharko dute hiru puntuak etxean gera daitezen. Mutilek, berriz, Espainiako Kopako final hamaseirenetako neurketa izango dute igandean ere. Ponferradinaren aurka ariko dira El Toralin futbol zelaian (15:30). Bale edo kale, soilik irabazten duenak egingo du aurrera.
Izotz hockeyan, Txuri Urdineko mutilek Iberiar ligako partida bikoitza jokatuko dute asteburuan. Portugalgo Porto izango dute aurrez aurre. Bihar 21:00etan ariko dira etxeko talde gisa, eta etzi, 14:30ean, bisitari moduan. Sailkapenean hirugarren tokian dago Porto, eta donostiarren aldean, denboraldi ona egiten ari dira. Txuri Urdineko mutilak seigarren postuan daude.
PARTIDAK
Saskibaloia
Emakumezkoen liga, 15. jardunaldia
- Araski – Ibaeta Basket (bihar, larunbata, 19:00)
Gizonezkoen bigarren mailako liga, 15. jardunaldia
- Oviedo – Gipuzkoa Basket (bihar, larunbata, 18:30)
Futbola
Emakumezkoen liga, 16. jardunaldia
- Reala – Bartzelona (etzi, igandea, 13:30)
Espainiako Kopa, final-hamaseirenak
- Ponferradina – Reala (etzi, igandea, 15:30)
Izotz hockeya
Gizonezkoen iberiar liga, 14. eta 15. jardunaldiak
- Txuri Urdin – Porto (bihar, larunbata, 21:00)
- Porto – Txuri Urdin (etzi, igandea, 14:30)
