6.200 emakumek parte hartuko dute 35. Lilatoian
35. Lilatoiaren aurkezpen argazkia, udaletxearen aurrean.Donostiako Udala 
Igandean, hilaren 23an, 35. Lilatoia egingo dute, eta 6.200 emakumek eman dute izena. Urtero moduan, lasterketaren helburua “emakumeak kirolaren bidez ahalduntzea da, osasuna, inklusioa eta talde lana sustatuz”. Aurtengo Lilatoiaren aurkezpen ofiziala gaur goizean egin dute, Donostiako Udaletxean.
Bost kilometroko proba Donostiako Atletikok antolatu du, eta dena prest dute iganderako. Lilatoia 10:25ean abiatuko da handbike modalitateko parte hartzaileen irteerarekin, eta 10:30ean irteera orokorra egingo dute. Aurretik, 10:00etatik 10:15era, aldez aurreko beroketa orokorra egingo da zumba saio batekin, Bulebarrean.
Aurkezpenean, Donostiako Udaleko, Gipuzkoako Foru Aldundiko eta Donostiako Atletikoko ordezkariek parte hartu dute. “Lasterketa herrikoia baino askoz gehiago da: kirolaren, berdintasunaren eta edozein erronka konkistatzeko gaitasunaren bidez emakumeen ahalduntzea ospatzea da”, adierazi du Ane Oiarbide Berdintasun zinegotziak. Gaineratu duenez, “adin guztietako parte hartzaileak ikusteak gogorarazten digu Lilatoiaren espirituak belaunaldiak gainditzen dituela, berdintasunaren aldeko borrokak inoiz baino biziago jarraitzen duela eta lortu ezin dugun helbururik ez dagoela erakutsiz”.
Alicia Vicandi Donostia Atletikoko komunikazio arduradunak, berriz, Lilatoiak beste behin ere jasotako babesa eskertu du. “35. edizioak bere hazkundea eta kirolarekiko eta berdintasunarekiko konpromisoa egiaztatzen du, 6.200 pertsona inskribatu baitira. Erakundeen, babesleen eta boluntarioen lankidetzari esker, zaindutako antolakuntza batekin batera, hiri honetan jada sendotuta dagoen tradizio batekin jarraitzea bilatzen dugu”, nabarmendu du Vicandik. Bestalde, gogorarazi du aurten ere “euro solidarioa” egongo dela: “Dortsalaren preziotik euro bat emango zaio Minbiziaren Aurkako Gipuzkoako Elkarteari, Gipuzkoan pazienteei eta familiei laguntzen funtsezko lana egiten duen elkarteari”.
Informazio praktikoa
Izena eman duten emakume guztiek, ostiralean eta larunbatean jaso ahal izango dituzte dortsalak Emakumearen Etxean —Okendo kaleko 9. zenbakian—. Apalategi kirol dendan ere hartu ahal izango dira.
Lasterketaren egun berean Gipuzkoa Plazan poltsak uzteko kontsigna zerbitzua egongo da 09.00etatik 12.00etara, eta probaren ondoren, parte hartzaileek Kontxako hondartzako kabinetako dutxak erabili ahal izango dituzte.
Sari banaketa, berriz, Alderdi Ederren egingo da 11.30ean, eta kategoria bakoitzeko lehenengo hirurak sarituko dira: gazteak, absolutuak eta beteranoak. Sari berezi bat ere emango zaie hiru talde ugarienei. Ondoren, Lilapoteaz —pintxoa eta edaria— gozatzeko aukera izango da Parte Zaharreko hainbat tabernatan.
