Lila Oinez, emakume guztientzako Lilatoi alternatiboa
50 bat emakume elkartu dira, Lila Oinez egitasmoan parte hartzeko.Beñat Parra 
Igandean egingo dute 35. Lilatoia Donostian, 6.200 emakumeren parte hartzearekin. Ostiral goizean, ordea, Erroak elkarteak Lilatoiaren eta udaleko Berdintasun Sailaren babesarekin antolatuta, Lila Oinez egitasmoa egin dute, Lilatoi alternatibo gisa.
50 bat emakume elkartu dira Bulebarrean 10:30ean, eta musikaz lagunduta, Erdialdeko hainbat kale zeharkatu dituzte oinez, Emakumeen Etxeraino joateko, giro ederrean. “Lilatoia ez da lehiaketa bat soilik, feminismoaren ospakizun bat da, emakumeen borrokaren oroigarri. Kirolaren bidez, emakumearen ahalduntzea du helburu”, nabarmendu du Erroak elkarteak.
Gizarteratzearen arloan egiten du lan elkarteak, eta, azaldu dutenez, artatzen dituzten emakume askori “ezinezkoa” zaie Lilatoiaren moduko egitasmoetan parte hartzea, hainbat arrazoirengatik, eta hori dela eta antolatu dute Lila Oinez egitasmoa: “Erroak-ek feminismoaren borrokan duen konpromisoa irmoa da eta kirola ahalduntzeko tresna izan daitekeela partekatzen dugu Lilatoi mugimenduarekin. Hori dela eta, gure zerbitzuetako emakumeentzat irisgarria den ibilbide bat duen ekimena antolatu dugu, lasai oinez egin daitekeena. Lilatoia inguratzen duen mugimendu feminista ikusaraztea eta emakumearen eskubideak ospatzeko aukera ematea da helburua”.
