Kopa etxera ekarri du Bera Berak
Bera Berako jokalariak, Granolleresen irabazitako kopa ospatzen.Bera Bera 
Bederatzigarrenez, Espainiako Kopa altxatzea lortu du Bera Bera Donostiako eskubaloi taldeak. Atarrabiako (Nafarroa) Beti Onak taldea 21-30 garaituta, oroigarri preziatua etxera ekartzea lortu du klub donostiarrak.
Ostiralean abiatu zuten azken fasea, Granollersen. Kanaria Handiko Rocasa gainditu zuten final-laurdenetan, Porriño finalerdietan eta Beti Onak gainditu dute, azkenean, gaur (hilak 16) jokatu duten finalean.
Euskal herritarrez beteta zeuden Granollersko harmailak, eta txistu ugari eginda hasi dute neurketa, Espainiako ereserkia entzun denean. Hortik aurrera, maila altuko kirola gailendu da eta, batez ere, Bera Bera izan da gailendu dena: lauzpabost goleko abantaila atera dio lehenengo minutuetan talde nafarrari, finala bideratuz.
Hainbat gorabeheraren ondoren, 11-16ko markagailuarekin iritsi dira atsedenaldira. Donostiarrek nagusi izaten jarraitu dute, baina nafarrek ez dute etsi, eta aldea lau puntura murriztea lortu dute 44. minutuan. Bera Berak, aldiz, ez du erritmoa jaitsi, eta 21-30-eko markagailuarekin itxi du neurketa erabakigarria. Horrela, denboraldiko lorpen esanguratsuenetako bat eskuratu du dagoeneko talde donostiarrak, eta hirian jokatuko da horregatik 2026ko kopa.
