Txuri Urdinek bere hirugarren liga irabazi du
Txuri Urdineko neskak irabazitako hirugarren liga ospatzen, Majadahondan.Txuri Urdin 
Bost partida behar izan dituzte, baina lortu dute: emakumezkoen izotz hockeyko Espainiako Liga irabazi du Txuri Urdin klub donostiarrak, hirugarrenez.
Majadahondaren aurka jokatu dute finala. Madrildarrek zein donostiarrek bina partida irabazita zituzten aurretik, eta neurketa erabakigarria jokatu dute igande eguerdian Majadahondako La Neveran.
Kanporaketa oso parekatua izan da, eta gaurko neurketa ere bai. Txuri Urdin aurreratu da markagailuan bigarren minutuan, Iara Hayeken eskutik. Lehenengo zatia amaitu aurretik, ordea, madrildarrek berdinketa eskuratu dute. Bigarren zatia hasi eta gutxira, Haizea Fernandez de Romarategik berriz aurreratu ditu Donostiakoak markagailuan, eta berak sartu du hirugarrena ere, 48. minutuan. Etxekoek, aldiz, ez dute etsi, eta neurketaren amaieran aldea murriztu dute, baina ez dute harago joatea lortu.
Horrela, 2022an eta 2024an egin zuten moduan, liga eskuratzeko balentria egin dute Txuri Urdineko neskek, eta garaikur hori gehien irabazi duten hirugarren kluba dira orain.
