Posible da, baliteke
Realak kopako finalerdietako itzulerakoa jokatuko du gaur Real Madrilen kontra, Santiago Bernabeu futbol zelaian (21:30).
Realak Real Madril kanporatu zuen Espainiako Kopan, 2020an.Reala 
Ezkorren eta baikorren arteko dema bizia izan ohi da. Ezinezkoa dela uste dute batzuek, eta posible dela besteek. Dema horren gainetik dago Realak gaur Madrilen jokatuko duen partida. Espainiako Kopako finalerdietako itzulerakoa jokatuko dute Santiago Bernabeu zelaian, noski, Real Madrilen kontra (21:30). Joanekoa urrun geratu bada ere denboran, oso presente dago desabantaila. Txuri-urdinek galdu egin zuten Anoetan (0-1), eta markagailua irauli beharko dute Sevillako finala jokatzeko.
Atariko guztiek urte eta partida berean jarri dute fokua. 2020an, Espainiako Kopako final-laurdenetan, Realak Real Madril kanporatu zuen Santiago Bernabeun, partida bakarrera jokaturiko lehia eroan (3-4). Ezinezkoa zirudiena posible egin zuten txuri-urdinek. Orduko taldea eta egungoa ez dira berdinak, ezta arerioa ere. Kanporaketa bera ere ez da berdina, finalerdietan egin dutelako topo bi taldeek, eta gol bateko desabantaila duelako Realak. Horrela ere, harrokeriarik gabeko harrotasunez hartuko dute gaueko norgehiagoka.
Imanol Alguacilek ez ditu nahi dituen jokalari guztiak eskura izango, baina dituenekin egin beharko dio aurre erronkari. Min hartuta daudenak asko dira, eta horien artetik Brais Mendez da taldeak gehien beharko lukeena. Arsen Zakharyan, Sheraldo Becker, Alvaro Odriozola eta Jon Pancheco ere ez dira jokatzeko moduan izango. Ondorioz, ohikoekin eta ondoen dabiltzanekin osatu beharko du entrenatzaileak hamaikakoa.
Alex Remiro izango da atezaina, eta atzeko lerroan espero dira Jon Mikel Aramburu, Igor Zubeldia, Nayef Aguerd eta Aihen Muñoz. Erdian, berriz, Martin Zubimendi eta Luka Sucic titularrak izango dira, ezustekorik ezean. Laugarrena Jon Ander Olasagasti, Sergio Gomez edo Pablo Marin izan daiteke. Azkenik, aurreko lerroan izango dira Mikel Oiartzabal kapitaina erdiko aurrelari moduan, eta hegaletan, Take Kubo eta Ander Barrenetxea.
Ez da posible? Ezin liteke? Akaso hobe da hau esatea: posible da, baliteke!
