Harro herri, Reala
Kopako finaletik at geratu dira txuri-urdinak, Real Madril estu hartu eta luzapena jokatzera behartu ondoren (4-4).
Mikel Oiartzabal kapitainak egindako laugarren gol garrantzitsuaren ospakizuna.Reala 
Futbolaren erruleta martxan jarri zuten atzo Realak eta Real Madrilek, Santiago Bernabeu futbol zelaian. Espainiako Kopako finala zuten jomuga, eta biek muturreraino eraman zuten lehia. 90 minutuak ez ziren aski izan finalista erabakitzeko, batez ere, txuri-urdinek garesti saldu zutelako porrota. Batetik, finalerdietako kanporaketa irauli zutelako (1-3), eta, bestetik, Mikel Oiartzabalek bigarren zatiko luzapenean egin zuen laugarren golarengatik (3-4).
Ahaztezina bezain luzea izan zen gauerdira arte luzatu zen norgehiagoka. Realak ondo baino hobeto ekin zion balentria egiteko asmoari. Ander Barrenetxea donostiarrak Real Madrileko jokalari hainbati iskin egin, eta baloia Luninen ate barrura bidali zuen, 16. minutuan. Aurretik eta ondoren, etxekoek aukera ugari izan zituzten, txuri-urdinen atzeko lerroaren ahultasuna agerian utziz. Zorionez, ordea, ez zuten asmatu, 30. minutura arte. Endrick gazteak, joanekoan egin moduan, Realari bizkarra hartu eta berdinketa ezarri zuen. Lehen zatia modu paretsuan bukatu zuten bi taldeek.
Txuri-urdinak bigarren zatian hazi ziren, pixkanaka. Atzeko gabeziak gutxitu, eta pauso batzuk aurrera eman zituzten. Horren fruitua azken hogei minutuetan jaso zuen Realak. Bi jokaldi erok kanporaketa irauli zuten, eta txuri-urdinek finala eskura izan zuten. Lehenik, 72. minutuan, Alabak bere atean sartu zuen gola, Pablo Marin gazte eta bihurriaren jokaldi baten ostean. Bigarrenik, 80. minutuan, Oiartzabalen jaurtiketa batek pinball eran zulatu zuen Real Madrilen atea, hirugarrenez. Markagailuan 1-3koa ezarrita, emaitzari eustea baino ez zuen Realak. Ordea, ezin da Real Madril gutxietsi, eta gutxiago haien etxean jokatuta. 81. minutuan Bellinghamek, berriz ere, agerian utzi zuen txuri-urdinen defentsa ahula. Korner baten bidez sartu zuen madrildarren gola. Dena dela, korner hori ahalbidetu zuen aurreko jokaldian, epaileak ez zuen Mbapperen jokoz kanpokoa adierazi nahi izan. Hori gutxi balitz, 86. minutuan, neurketa berdindu zuen Tchouamenik, txuri-urdinen atzeko ahultasuna baliatuta.
Partida hor bukatu zela pentsatu zuten askok, baina ez. Zazpi minutuko luzapenean edozer gerta zitekeen, behar bezala sinetsita. Realak aspaldiko partez hori bera egin zuen, eta 93. minutuan Oiartzabalek Sergio Gomezen erdiraketa bikaina ate barrura bidali zuen. 3-4koarekin, kanporaketa berdintzea lortu zuten txuri-urdinek, eta arauzko denbora bukatuta, luzapeneko 30 minutuak behartu zituzten. Nekea eta arazo fisikoak agerian utzi zituzten bi taldeek, eta Real Madrilen aldaketak Realarenak baino eraginkorragoak izan ziren. Luzapeneko lehen zatia berdin bukatu zen, baina bigarrenean iritsi zen desio ez den kolpe latza. Berriz ere, geldikako jokaldi batean, Rudigerrek egin zuen gol erabakigarria, kornerretik bidali zioten baloia buruz sareetara bidalita. Hor bukatu zen dena.
Atzo gauean triste bezain harro zeuden Realeko jokalariak eta teknikariak. Harro bezain triste Realzaleak, sutsuak eta apalak. Biharamunean, seguru harrotasunaren koloreak biziagoak direla. Noski, txuri-urdinak.
