Roller derby liga hartuko du Manteo kiroldegiak
Sugegorriak talde donostiarraren eta Errioxako Roller Derby taldearen arteko otsaileko neurketa.Alberto Cmuz 
Larunbatean, hilaren 5ean, Roller Derby ligako hiru partida jokatuko dituzte Groseko Manteo kiroldegian. Lehena, Donostiako Sugegorriak eta Nafarroako Nafarriors taldeen artekoa izango da (15:15). Bigarrena, berriz, Nafarriors eta Kanarietako Las Palmas Roller Derby taldeen artekoa (17:15). Hirugarren eta azkena, Errioxako Roller Derby Rioja eta Las Palmas Roller Derby taldeek jokatuko dute (19:15). Partida hauek erabakigarriak izango dira ligan sailkatzeko eta finala nork jokatuko duen jakiteko.
Hain zuzen ere, Sugegorriak Roller Derby kirol kluba —Easo Avengers izena zuena lehen—, 2013an sortu zen Donostian, eta Gipuzkoako roller derby talde bakarra da. Beraiek arduratu dira asteburuko neurketak antolatzeaz.
Roller derby-a taldekako kirol feminista da, tradizioz emakumeek edo genero disidenteetako pertsonek —trans, genero jariakorra edo ez-bitarra, queer eta abar— praktikatzen dutena, patinetan jokatzen dena, forma obalatuarekin mugatutako espazio baten barruan. Beste kirol batzuetan ez bezala, jokalariek berebiziko garrantzia dute, izan ere, puntuak kontrako taldeko jokalarien aldakak gaindituz lortzen dira eta ez da baloirik erabiltzen. Kontaktu, abiadura, erresistentzia eta teknika kirola da, eta estrategia eta, batez ere, talde jokoa dira haren gakoak.
Kirol hau jatorriz Estatu Batuetakoa da eta quad patinetan edo patin tradizionaletan egiten da. Jokoaren mekanika pista obalatu baten inguruko patinen gaineko lasterketa batean oinarritzen da, erlojuaren orratzen kontrako norabidean. Pista horretan, pistan bost jokalariko bi talde (anotatzaile bat eta lau defentsa) elkarren artean lehiatzen dira, ahalik eta puntu gehien pilatzeko asmoz, anotatzaileak jokalari defendatzaileak gainditzen dituen heinean; izan ere, jokalari horiei aukera ematen diete pasatzea eragozteko eta oztopatzeko, arauzko kontaktu fisikoaren bidez. Jokoaren helburua kontrako taldeak baino puntu gehiago lortzea da, eta irabazlea partidaren amaieran puntu gehien dituen taldea da.
Kirolaren historia
1930ean hasi zen, Leo Seltzer sustatzaileak roller derby izena erregistratu zuenean, eta patinatzaile profesionalen konpainia ibiltariak erabiltzeko gorde zuen. Roller derbya AEBetako kultura herrikoiaren ikono bezala errotu zen, Estatu Batuetako hiri askotan izandako partiduei esker, 1970eko hamarkadaren erdialdean gainbehera etorri zen arte.
Roller derby garaikidearen berpizkundea 2.000. urteko hamarkadaren hasieran gertatu zen, Austinen, Texasen. 2004an, emakumezkoen ligen talde batek, emakumeak ahalduntzeko asmoz, gaur egun Women ‘s Flat Track Derby Association (WFTDA) delakoa eratu zuen, ligetako kideen arteko lehiaketa arautzen duten arauak koordinatu eta ezartzen dituena. Eta bere jarduera mundu osoan arautzen duen elkarte honen arau garrantzitsuenen artean mota guztietako generoak (genero hedakorrak, transgeneroa, intersexuala, genero ez-bitarrak…) lehiaketa ofizialetan onartzean dago. Horrek alde handia dakar beste kirol batzuekiko, non ez den onartzen cis pertsona ez denik.
