TAOa Bidebietara zabaltzeko eskatu du PPk
Bidebietako Ainguraren biribilgunea, Pasai San Pedrorekin muga.Beñat Parra 
Donostiako PPk eskatu du TAO sistema Bidebieta auzoraino zabaltzeko, bertan aparkalekuarekin dagoen arazoari irtenbidea emateko. Borja Corominasen buru duen udal taldeak interpelazio bat aurkeztu du horri buruz, Espazio Publikoari, Obrei eta Zerbitzu Publikoei buruzko hurrengo udal batzordean eztabaidatuko dena, hilaren 1oean.
Aparkalekuekin arazo handia dago Bidebietan aspalditik, eta, Mercadona supermerkatua irekitzen dutenean, hori areagotu daitekeela ohartarazi izan du sarritan Bideak auzo elkarteak, baita hainbat proposamen egin ere, hala nola, egoiliarrentzako plazak sortzea eta bizpahiru solairuko aparkaleku bat eraikitzea. Horrela, arazo horri erreparatu diote orain popularrek, TAOaren alde eginez: “TAOa zabaltzeak aparkalekua hobeto kudeatzea ahalbidetuko luke, eta auzotarrek beren auzoan aparkatzeko lehentasuna izatea bermatuko luke”, nabarmendu du Corominasek.
“TAO tresna eraginkorra da aparkatzea arautzeko eta beste auzo batzuetako eta kanpoko auzoetako egoiliarren ibilgailuen presentzia murrizteko, askotan lekurik betetzen baitute kontrolik gabeko bizitegi eremuetan. Beste auzo batzuetan ezartzea erabilgarria izan da aparkalekuaren saturazioa saihesteko eta ibilgailuen errotazio handiagoa ahalbidetzeko”, gaineratu du bozeramaileak. Era berean, adierazi du TAOa ezartzetik harago, “auzoaren behar espezifikoei buruzko azterketa xehatua” egin beharko lukeela udalak, “baita egoiliarrei lehentasuna emango dieten tarifen eta ordutegien diseinua egin ere”.
