Donostiako Portuko Kontseilua eratu dute
Kaiaren kudeaketa hobetzeko xedez, asteazkenean eratu zen Donostiako Portuko Kontseilua, kaiari lotutako aholkularitza, kontsulta eta eztabaida erakundea. Horren parte dira, udalaz gain, kofradia, Nautikoa, Kaiako Bizilagunen Elkartea, Kaiaberri Amarratzaileen Elkartea, Gipuzkoako Kofradien Federazioa eta Eusko Jaurlaritza.
Eginkizunen artean ditu: portu-eremuko beharrak aztertu eta bertako instalazioen eta azaleren erabilera hobeto kudeatzea ekarriko duten jarduketak proposatzea; portuetan eta itsas gaietan eskumena duen Sailak idazten dituen gidalerro eta planei buruz aholkatzea, eta EAEko administrazioak portuen arloan egiten dituen erregelamenduzko xedapenen proiektuei buruzko txostena egitea. Era berean, neurri egokiak proposatuko ditu portuen ustiapena hobetzeko, administrazioekin koordinazioa sustatu eta portuko jabari publikoaren ezagutza, kontserbazioa eta babesa bultzatzen dituzte.
Portuak bi dartsena ditu, eta bertan dute amarradura 175 laketontzik, hiru arrantza ontzik eta Santa Klara uhartera bidaiariak eramateko edo Pasaiara txangoak egiteko zenbait garraio ontzik. Udalak emakidan ditu portuko jabari publikoan uraren eta saneamenduaren sarea, hiri hondakin solidoen edukiontzien arloa, zurezko zorua duen begiratokia metalezko ontziralekuaren ondoan, mareografo bat eta oinezkoen ibilbideen seinaleak eta monumentuen informazio-zutoinak. Portuko eremuan daude, halaber, udalak kudeatuta, Portaviones izeneko eraikinean, komun publikoak.
Itsasertzaren Garapenaren eta Portuen Zuzendaritzak bi proiektu idazteko lizitazioa egingo du aurten: Donostiako Klub Nautikoaren egoitza dagoen kaia eta Nautikoaren egoitza dagoen kaia eta metalezko ontziralekua zaharberritzekoa eta erdiko kaia edo Moierdi konpontzeko eta indartzeko proiektua.
