Eguzkik EKPri eskatu dio portuan erabiltzen dituzten garbiketa produktu eta prozedurak berrikusteko
Portua garbitzeko produktuak eta prozedurak salatu ditu EguzkikEguzki talde ekologista 
Eguzkik, ohar baten bidez, Euskadiko Kirol Portuari (EKP) eskatu dio Donostiako portua garbitzeko erabiltzen dituen garbiketa produktu eta prozedurak berrikusteko. Bertan diotenez, Donostiako portua garbitzeko erabilitako produktuak auzitan jartzen dituen bideo bat badabil egunotan sare sozialetan eta milaka ikustaldi ditu. Gogoratu dutenez, talde ekologistak berak 2023ko abuztuan ere salatu zuen portuan “ehunka litro lixiba” isurtzea. Salaketa hura udalera heldu zen, baina komunikabide eta herritarren artean “zalaparta pixka bat” piztu bazuen ere, ez zuen ondoriorik izan.
Edonola, ondorioztatu zuten EKPk portua garbitzeko erabiltzen duen produktua ez dela lixiba ANTON ECO baizik. “Produktu ‘ekologikoa’ eta ‘biodegradagarria’ omen da, baina fitxa teknikoan bertan badira hain ECO ez dela susmatzera garamatzaten zantzuak” baieztatu du talde ekologistak eta horren erakusgarri bertan jasotako zenbait esaldi aipatzen ditu:
• “Kaltegarria da uretako organismoentzat, eta ondorio kaltegarri iraunkorrak ditu”.
• “Ingurumenean libratzea eragotzi egin behar da”.
• “Produktu hau ingurumenerako arriskutsua denez, kutsadura kontrolatzeko hesiak dituen eremu batean manipulatzea gomendatzen da”.
Eguzkik nabarmendu du, produktua manipulatzeko eskularruak, maskara eta autobabeserako beste neurri batzuk behar direla ere ohartarazten duela produktuaren fitxak. Hortaz, eta portuan diluituta erabiltzen dela badirudi ere, “garbi dago ez dela inolaz ere produktu ‘kaltegabea’.
Hori horrela, Eguzkik EKPri eskatu dio “salaketa biral berriaren aurrean entzungorrarena egin ordez, aprobetxatzeko eskaintzen duen aukera garbiketa-produktu eta prozedurak berrikusteko”.
