Esther Arrojeriak eta Alba Menendezek sasoi bukaeran hartuko dute erretiroa
Bera Berarekin hamargarren liga, denboraldiko hirugarren titulua, eskuratu nahi dute agur esan baino lehen.
Esther Arrojeria, Tati Garmendia eta Alba Menendez, Donostiako Kirol Etxean egindako agerraldian.Bera Bera 
Europan historia egin, eta lauko finalaren atarian geratu ondoren, Bera Berako bi jokalari garrantzitsuk erretiroa hartuko dute denboraldiaren bukaeran: Esther Arrojeria (Usurbil, 1994) eta Alba Menendez (Zarautz, 1991) kapitainek.
Gaur goizean iragarri dute erabakia, Donostiako Kirol Etxean egindako agerraldian. Tati Garmendia eskubaloi taldeko arduradunarekin batera azaldu dituzte eskubaloi profesionala uzteko arrazoiak. Negar malkoen artean, biek nabarmendu dute Bera Beraren ibilbideko hamargarren ligarekin bukatu nahi dutela sasoia, eta, aukeran, “hiru tituluekin”. Hain zuzen ere, Superkopa Iberiarra eta Espainiako Kopa irabazi dituzte denboraldi honetan.
Menendez 2009an hasi zen Bera Beran jokatzen, eta, guztira, hamasei urteko ibilbide arrakastatsuari bukaera emango dio. Izan ere, klubak lortu dituen 28 tituluetatik 25 zarauztarrak ere eskuratu ditu. “Eskubaloiaz aparte lan erreal bat daukat, eta azken urteotan eskubaloiarekin uztartzeko gai izan naiz. Ordea, denboraldi hau gogorra egiten ari zait. Azken urteotan adierazi dut nire azken urtea izan zitekeela, eta, orain bai, iritsi da. Europako Ligako ligaxka jokatzea zen nire helburua, eta hori beteta, erretiroa hartzeko seinalea izan zen”, azaldu du Menendezek.
Arrojeria, berriz, 2012an iritsi zen Donostiako taldera, eta hamahiru urteko bide emankorra beteko du. Usurbildarrak ere titulu sorta ederra lortu du taldearekin: 23, guztira. Horrekin batera, Bera Beraren historiako bosgarren golegile nagusia da. “Erizaina naiz, eta jokatzen jarraitzeko moduan nagoen arren, nire bizitza lanetik bideratu nahi dudala erabaki dut. Pauso hori emateko unea iritsi da. Momentu on batean utzi nahi nuen, asko gozatzen ari naizelako, eta uste dut horrela erretiratu nahi dudala. Oso lasai nago erabakia hartu nuenetik”, adierazi du Arrojeriak.
Mahai ingurua
Arrojeriak parte hartuko du IRUTXULOKO HITZAk apirilaren 7an egingo duen emakume kirolarien bizipenenei eta aliantzei buruzko mahai inguruan. 18:00etan izango da, Donostiako Udaletxeko udal batzar aretoan. Bera Berako jokalariarekin batera izango dira Miriam Arrillaga pilotaria, Xubane Uribarrena Donostia Arraun Lagunak-eko arraunlaria eta Garbiñe Etxeberria Realeko kirol zuzendaria. Aldiz, Amets Castrejanak gidatuko du solasaldia.
