'Late night' berri bat grabatzen hasiko dira Donostian: 'Linbo'
Hiru Damatxo ekoiztetxeak EITB Mediarentzat egingo du euskarazko 'late night' saioa.
Euskarazko late night telebista saio berri bat grabatzen hasiko da Hiru Damatxo ekoiztetxe donostiarra, EITB Mediarentzat: Linbo. Donostian grabatuko dute, Egiako Gazteszena aretoan, eta lehenengo lau grabaketetara joateko izen ematea ireki dute dagoeneko. Apirilaren 9an bi saio grabatuko dituzte eta 10ean beste bi —17:30 eta 19:30, bi kasuetan—.
Iazko azaroan, Barraka saioa estreinatu zuten Primeran plataforman, hori ere Hiru Damatxok ekoiztutakoa eta Gazteszenan grabatutakoa. Ordea, Iker Plazaola aurkezleak ustez egindako sexu erasoen inguruko salaketak azaleratu ziren estreinatu eta gutxira, eta saioa bertan behera utzi zuten. Momentuz, ez dute iragarri nor izango den saio berriko aurkezlea.
