NODEk eta Kutxa Fundazioak ostegunean abiatuko dute aurtengo LABO GO zikloa
Apirila eta ekaina bitartean aurrera eramango dituzte saioak, arte eszenikoen sorkuntza prozesuak ikusaraztea helburu du.
Ana Cotore dantzaria.LABO GO 
NODE dantza eta performance konpainiak eta Kutxa Fundazioak aurtengo LABO GO zikloa aurkeztu dute. Saioak apirila eta ekaina bitartean aurrera eramango dituzte, arte eszenikoekin zerikusia duten hainbat diziplina edo jakintza arlotako artisten prozesuak ikusarazteko. Emanaldi bakoitzaren amaieran, solasaldi irekia egingo dute publikoarekin eta arte garaikideari buruzko elkarrizketa eta gogoeta sustatuko dute.
Saio guztiak Kutxa Fundazioa Klubean egingo dituzte, 19:00etan. Sarrerak doakoak badira ere, ezinbestekoa da online erreserba egitea.
Ostegunean, hilak 10, No necesito un hombre para ser mascota dantza eta antzerkia, Ana Cotore. Sormen prozesuan egoten den higadura emozionala eta fisikoa aztertuko du.
Hilak 24, Argilunak – Itzalekin Dantzan dantza eta proiekzioak, Komorebi Produkzioak. Doluari eta existentziaren kontrasteei buruzko gogoetarako diziplinarteko ikuskizuna.
Maiatzak 8, Topaketak dantza eta zuzeneko musika, Rev Silver eta Oihana Vesga. Musikari baten eta dantzari baten arteko topaketa, inprobisazioa elkarrizketa artistiko eta emozionalerako gune bihurtzen da.
Maiatzak 29, Vulnerable Tryptich dantza eta dokumentala, Zorütik eta Eneko Gil. Hizkuntza koreografikoaren bidez gizontasunaren zaurgarritasunean sakontzen duen izen bereko dokumentalaren proiekzioa.
Ekainak 12, Sexy Ubú. Make Ubú Great Again performancea eta antzerki garaikide, Cía. Traspasarte. Irudiaren eta boterearen obsesioa satirizatzen duen proposamen hibridoa.
Ekainak 26, Basandere dantza garaikidea, NODE. Euskal mitologian oinarrituta, klima krisiari eta horrek emakumeen bizitzan duen eraginari heltzen dien pieza.
LABO 2017an sortu zuen NODEk, arte eszeniko garaikideak erakusteko gune irekiak sortzeko helburuz, sorkuntzarako agertoki berriak eskainiz eta artisten, erakundeen, kultura-
eragileen eta publikoaren arteko topaketa erraztuz. Kutxa Fundazioak, berriz, kulturaren, arteen eta humanitateen aldeko apustua indartzen du ziklo honekin, ezagutza eraikitzeko funtsezko tresna diren aldetik. Egitasmoaren helburua, talentu artistikoa sustatzea eta babestea da, sormen-lanari prestigioa emanez eta artearen sozializazioa sustatuz pentsamendu kritikorako eta begiraden aniztasunerako tresna gisa.
