Astebururako plan bila?
'An Eve and an Adam' ikuskizuna. 
Asteburua aprobetxatzeko plan bila al zabiltza? Gure agendan Donostiako kultur eta aisialdi ekitaldi aukeraketa zabala aurkituko duzu, eta, jarraian, egun bakoitzeko proposamen bat egingo dizugu.
Ostiralean (hilak 2), An Eve and an Adam Palle Granhøjen dantza ikuskizuna ikustera joatea gomendatzen dizugu. Viktoria Eugenia antzokiko Klub aretoan taularatuko dute, 19:30ean, eta sarrerak hemen daude salgai, 15 euroan.
Larunbatean (hilak 3), plan desberdin bat proposatuko dizugu: Martuteneko Janen ibilaldia. Impact Hub taldeak antolatu ohi ditu Donostiako Janen ibilaldiak, 2012tik, munduko hainbat hiritan egin ohi den moduan, Jane Jacobs (Scranton, Pensilvania, AEB, 1916—Toronto, Kanada, 2006) hirigile eta aktibistaren jaiotegunaren bueltan. Aurten, Martutene auzoa ezagutuko dute parte hartzaileek; maiatzaren 3an (larunbata) izango da, 10:00etan Renfeko geltokitik abiatuta. El Pilar kolonian (11:00), Gartziategi eta Lizeaga sagardotegietan (12:00), Antondegi eremuan (13:00) eta Aingelugoia baserrian (14:00) egingo dituzte geldialdiak. Impact Hubek, Altzako Historia Mintegiak, Ahiku elkarteak eta Nerea Lizarralde kazetariak antolatu dute elkarlanean aurtengo ibilaldia.
Azkenik, igandean (hilak 4), Dantzaren Nazioarteko Eguneko Galara joatea da gure proposamena. Dantza estilo sorta zabala erakutsiko dute Viktoria Eugenia antzokian, dantzari handien parte hartzearekin. 12:00etan eta 19:00etan egingo dute, eta sarrerak hemen daude salgai.
Bonus track: hurrengo asteko ostegunean (hilak 8), Poltsiko Antzerkiaren Jaialdia hasiko da Donostian: hilaren 25era bitarte, formatu txikiko 31 ikuskizun antolatu dituzte, hiriko 27 espaziotan banatuta. Ostegunean bertan, lau emanaldiz disfrutatzeko aukera egongo da, eta horietako bi euskaraz izango dira: Inprofestakzioa antzezlana Baga Biga Faktorian eta Igogailu batean amaitu zen mundua Museum Cemento Rezolan, biak 19:00etan.
