Hondarrezko gazteluen lehiaketa egingo dute larunbatean, Atecek antolatuta
Atece Gipuzkoa Hartutako Kalte Zerebralaren elkarteak hondarrezko gazteluen lehiaketa antolatu du larunbat goizerako, Ni Ateceren laguna naiz, eta zu? lelopean. Deialdia adin guztietako pertsonentzat zabalik dago eta Kontxako hondartzako erlojuen ondoan egingo da.
Izen-emateak -6 euro haurrentzat eta 8 helduentzat- online egin daitezke castillosatece.net webgunean edo egun berean antolakuntzaren karpan. Parte hartzaileak gehienez lau pertsonako taldeetan lehiatuko dira hareazko gaztelu, irudi edo eskulturak sortzeko, eta sariak jasotzeko aukera izango dute hainbat kategoriatan. Oparien zozketak ere izango dira, hala nola Gipuzkoa Basketerako sarrerak, jatetxeetako menuak eta kirol esperientziak.
Gainera, sand art-eko Isarlur eta German Cedano artistek erakustaldiak egingo dituzte. Jai eta familia giroan hartutako kalte zerebrala ikusaraztea da helburua.
