istripua
Bi adingabe ospitalera eraman dituzte Loiolako Erriberan metalezko ate bat gainera erori ostean
Donostiako ospitalea. Beñat Parra 
Bi adingabe Donostia Ospitalera eraman zituzten atzo arratsaldean, metalezko ate bat gainera erori ostean, Eusko Jaurlaritzako Segurtasun Sailak jakitera eman duenez.
Ezbeharra 16:50ak aldera gertatu zen, Loiolako Erriberako Ikasbide ikastolan. Bi adingabeak, ikastetxeko ikasleak, ate lerragarri batek harrapatuta geratu ziren, eta ate hori, ondoren, bien gainean erori zen. Bertaratutako osasun langileek ospitalera eraman zituzten, eta ZIUn artatu zituzten.
Bi zaurituetako batek traumatismoa du buruan eta entzefaloan, eta bigarrenak albo-kolpea buruan eta bizkarrean. Pronostiko arin-moderatua du. Biak ospitalean daude.
