Donostia Arraun Lagunak-ek irabazi du berriz ere Gipuzkoako txapelketa
Donostiarrako mutilak txapeldunordeak izan dira, neskak azken-aurren izan dira eta Fortuna izan da onena beteranoetan.
Donostia Arraun Lagunak-eko arraunlariak, teknikariak eta presidentea Gipuzkoako banderarekin.Donostia Arraun Lagunak 
Hautagai nagusi izateak ez du ziurtatzen garaipenik, baina Donostia Arraun Lagunak-ek esperotako maila eman du Orion jokaturiko Gipuzkoako Traineru Txapelketan. Onenak izan dira hirugarren txanda erabakigarrian (11:10,08), eta hirugarrenez irabazi dute gaur txapelketa —iaz eta 2021ean eskuratu zituzten beste biak—. Donostiarrako neskek, ordea, bederatzigarren postuan bukatu dute, eta azken-aurrenak izan dira (11:42,60).
Hirugarren txandan aritu da Donostia Arraun Lagunak, Tolosaldea, Orio eta Donostiarra traineruekin batera. Lehia estua izan dute tolosarrekin, baina azken luzean erabakita utzi dute estropada. Beste bi lehiakideak, ordea, esperotakoa baino makalago aritu dira. Esaterako, oriotarrek seigarren denbora egin dute (11:23,60).
Ezustekoa haizeak baldintzatu du, eta, horregatik, Zarautzek hirugarren denborarik onena egin du (11:17,17), eta Hibaika izan da laugarren (11:22,06). Horrela, datorren asteko igandean jokatuko den Euskadiko txapelketan lau ordezkari gipuzkoarrak hauek izango dira: Donostia Arraun Lagunak, Tolosaldea, Zarautz eta Hibaika.
Etxekoak nagusi
Gizonezkoetan, Donostiarrak eskura izan du Gipuzkoako txapelketa, baina Oriok aurrea hartu dio. Etxeko taldeak ez du hutsik egin bere estropada eremuan, eta txapelketa irabazi dute (20:03,88). Donostiarrak bigarren postuarekin konformatu behar izan dira (20:06,76). San Juan izan da hirugarren onena (20:07,73) eta Hondarribia laugarrena (20:24,92). Aipaturiko lauek jokatuko dute Euskadiko txapelketa.
Azkenik, beteranoetan, Fortuna donostiarrek lortu dute garaipena (10:08,73). Ia bi segundoko alde txikiarekin menderatu dute Badok 13 ontzia (10:10,59). Illunbe izan da hirugarren (10:27,87) eta Zumaia laugarren (10:40,95).
