Eskuin muturreko talde batek 'Jesusen Bihotza'-ren aldeko ekimena egin du
'Donostiarra, defenda ezazu zurea' leloarekin pankarta bat jarri dute, Jesusen Bihotza duen Espainiako bandera batekin batera.
Revuelta taldeak Urgulleko 'Jesusen Bihotza'-n egindako ekintza.Revuelta 
Revuelta izeneko eskuin muturreko gazte erakundeak pankarta bat jarri du asteburuan Urgulleko Jesusen Bihotza eskulturatik zintzilik. Taldeak eskultura “defendatzeko” deia egin du, EH Bilduk eta Ahal Duguk “bota” egin nahi dutelakoan. Faltsua da honako baieztapena, alderdi bakar batek ere ez baitu eskatu eskultura botatzeko, eztabaida irekitzeko baizik.
Duela hilabete, Donostiako Udaleko Memoria Historikoaren Aholku Batzordeko Sinbologia Lantaldeak “eskultura frankista dela” frogatzeko dokumentua aurkeztu zuen, eta horri lotuta, Espainiako Memoria Demokratikoaren Legea betetzen ote duen aztertzeko eskatu zuten. Besteak beste, asteotan, Eneko Goia alkateak eta Donostiako Gotzainak defendatu dute eskultura, eta, orain, baita Vox alderdiari loturiko eskuin muturreko gazte erakunde honek ere.
Goia alkateak argudiatu zuenaren arabera, eskultura frankismoaren aurretik pentsatu zutenez, ez da frankismoaren gorazarre egiteko eskultura bat, funtzio erlijiosoa dela gailentzen dena, alegia. Ordea, Revueltakoek, beren beregi nabarmendu ez duten arren, frankismoarekin duen harremana ez dute ezbaian jartzen. Hain zuzen, Espainiako Erorien Harana monumentu frankistan antzeko ekintza burutu zuten iaz. Kasualitatea edo ez, arkitekto bera izan zen bi eskulturak egin zituena, Pedro Muguruza, hain zuzen.
Revuelta taldeak egindako ekimena Madrilgo ‘Erorien Harana’ monumentu frankistan.Revuelta
Atzera Begira atalean landu genuen joan den asteko astekarian. Hona hemen erreportajea.
