«Auzo oso polita da, eta politagoa izateko lanean jarraituko dugu»
Urteak daramatza herri izaera duen auzoa hobetzeko eta biziberritzeko lanean. Maite Barron (Martutene, 1985) izan zen Martutene Bizirik plataformaren sortzaileetako bat, eta egun Sarroeta auzo elkarteko presidentea ere bada. Donostiako periferian bizitzearen gabeziak gainditzea du helburu, Martutenen bizitzeak merezi duelako.
Maite Barron, Martuteneko bizilaguna.Inaxio Esnaola 
Zergatik aukeratu duzu Trinkete taberna?
Egunero joaten garen tabernak asteko atsedena duenez, terraza duen taberna bat aukeratu dut. Ez da nire gustukoena, baina ezagunenetako bat da, auzoaren sarreretako batean dagoelako.
Martutenen zenbat taberna daude?
Zortzi-bederatzi direla esango nuke auzo barruan, eta beste batzuk ere badira 27 Industrialdean. Horrez gain, sagardotegi batzuk ere baditugu. Martutenek 2.700 biztanle baino gehiago ditu, eta tabernak dira komertzioen artetik gehien ditugunak.
Gainerako establezimenduak, berriz, gutxiago dira?
Bai, nahiz eta azken urteotan mantendu diren. Daudenak ez dira itxi, baina ezta berriak ireki ere. Une honetan, Martutenen okindegi bat, arrandegi bat eta bi harategi ditugu. Horiek denak asko estimatzen ditugu. Era berean, supermerkatu eta fruta denda bana ere baditugu. Bestalde, azkazalak margotzeko establezimendu bat, eta pare bat ile apaindegi daude. Saiakerak egin dituzte beste komertzio batzuk zabaltzeko, baina ez zuten aurrera egin. Tamalez, auzoko liburu denda eta mertzeria bakarra duela urte batzuk itxi ziren.
Halere, Martutene bizirik dago?
Bai, eta horretan dihardugu lanean. Martutenek herri izaera duela diogu. Erraza da egunerokoa gure auzoan, gure artean denak elkar ezagutzen dugu. Zentzu horretan, tabernak lagungarriak dira elkartzeko, kafe bat hartzeko, lagunak topatzeko… Haurrek ere elkartzeko guneak dituzte hemen. Gazteek, ordea, zailago dute, aisialdirako aukera gutxiago dituztelako. Zorionez, gazte talde bat ari da lanean aukerak eskaintzeko 16tik 22 urtera bitartekoei.
Martutene Bizirik taldeko kidea ez ezik, Sarroeta auzo elkarteko presidentea ere bazara. Aurki, bi urte beteko dituzu karguan. Zer moduz daramazu?
Ez da erraza, lan asko egin behar dugulako. Gutxi gara, baina gauzak egiteko gogotsu daude, eta zoragarria da haiekin lan egitea. Hileroko bileran bost edo sei lagun elkartzen gara. Egunerokoan, berriz, hiru pertsona aritzen gara lanean auzoarentzat. Beste jarduera batzuk aurrera eramateko lantalde txikiak ditugu, eta horiekin elkartzen gara. Esaterako, berritu den euskara batzorde bat eta Gau Beltza antolatzeko taldetxoa. Auzoan, euskararekin sekulako erronka daukagu, oso gutxi erabiltzen delako.
Udalarekin dugun harremanari dagokionez, partaidetza prozesu bat egin dugu, baina auzoarentzako gauzak lortzeko prozesua oso motela izaten da. Kosta egiten da emaitzak lortzea, eta tarteka nahiko etsigarria da. Adibidez, sei urte behar izan ditugu hala moduz geratu den biribilgunea berritzeko.
«Gorabeherak izan ondoren, nahiko lasai gabiltza. Gainera, pozik gaude egoera lasaitzeko egindakoarekin»
Auzoari begira jarrita, zer da ikusten duzuna?
Potentzial handia duen auzo bat. Niri gustatzen zait nire semeek Martutenen bertan bizitza egin ahal izatea. Ateratzea, lagunekin egotea. Askatasun kontrolatu hori izatea. Berdegune ugari ditugu eta dagoeneko arazorik sortuko ez duen ibaia. Kontua da urtetan utzita egon dela eta gabeziak dituela. Auzo oso polita da, eta politagoa izateko lanean jarraituko dugu.
Zeintzuk dira gabezia horiek?
Asko ditugu. Barkaiztegiko eremua izan da gure lehentasunetako bat, eta nabarmen hobetu dute hara iristeko bidea. Orain pasabidea aldatzea falta da. Zona berean, badirudi Agustindarren eraikinari erabilera bat emango zaiola, eta ziur gaude Ortzadar fundazioak han garatu nahi duen proiektua onuragarria izango dela auzoarentzat.
Orain, berriz, Martuteneko Dbus zerbitzua hobetzeko lanean ari gara. Linea propio bat izatea litzateke irtenbiderik onena. Hori lortzea zaila dirudienez, gutxieneko batzuk eskatzen ditugu: 26. linearen maiztasuna areagotzea eta Erdialdera iristeko iraupena gutxitzea. Izan ere, 35-40 minutu behar ditugu. Azken batean, zerbitzu publikoak behar ditugu. Ez dugu udal kiroldegirik, eta gure anbulatorioa Txomiñenean dago. Beraz, garraio publiko duinagoa merezi dugu.
Eta zeintzuk dira azkenaldian lorturiko hobekuntzak?
Batez ere, auzoan kultur eta aisialdi jarduerak eskaintzea. Ez genuen ia programaziorik, eta auzoan ez dugu kultur etxerik. Horrela ere, diru laguntzak lortzen ari gara jarduerak antolatzeko. Doan edo prezio sinboliko batean eskaintzen ditugu. Azken batean, auzoa bizirik mantentzeko ezinbestekoak dira.
Zer nolakoa da Martuteneko auzotarren arteko bizikidetza?
Gorabeherak izan ondoren, nahiko lasai gabiltza orain. Gainera, pozik gaude gauzak lasaitzeko egindakoarekin. Une honetan, egoera zaurgarrian dauden ehun bat pertsona bizi dira Agustindarren eraikinean eta Villa Oyon etxean. Tentsioak sortu dira pertsona horietako batzuen eta hainbat bizilagunen artean, lapurretak areagotu direlako, eta besteen etxeetan sartzen saiatu direlako. Indarkeria kasuak ere gertatu dira pertsona horien artean.
Dena dela, argi adierazi nahi dut pertsona horiek ere auzotarrongana hurbildu direla integratzeko asmoarekin, eta Su Artean gisako egitasmoak bultzatu ditugu elkarrekin. Eskolako atarian ere horma irudi berri bat dago, eta agurrak hainbat hizkuntzetan irakur daitezke; baita arabieraz ere. Bestalde, auzoko irakasle jubilatuek eskola txiki bat ireki dute gaztelania doan irakasteko pertsona horiei. Beraz, harreman ona dago horietako batzuekin, eta hori da landu nahi dugun bizikidetza.
HAMABIETAN BERMUTA
Alkoholik gabeko garagardoa
Non: Trinkete taberna. Martutene pasealekua, 71 (Martutene).
Prezioa: 1,50 euro.
