Donostiarren arteko kanporaketa iraganeko kontua da
Kontxako Banderaren araudiak hainbat aldaketa izan ditu bere historia luzean. Esaterako, 1983tik 2007ra bitartean, Donostiako arraun kluben arteko kanporaketa bat jokatzen zen, hirian gizonezkoen traineru bat baino gehiago zegoelako.
Ur Kirolak trainerua da donostiarren arteko kanporaketa gehien irabazi dituena.Ur Kirolak 
Donostiako Udalak, Festak Sailaren bidez, Kontxako Banderaren araudia aldatu zuen pasa den maiatzean. Aurrerantzean, Euskotren ligan sailkapen onena lortzen duen emakumezkoen traineru donostiarra izango da hiriko ordezkaria Kontxako Banderan. Horrela, liga irabazi berritan, Donostia Arraun Lagunak-ek sari bikoitza eskuratu du, haien historian lehen aldiz ez dutelako sailkatze estropadarik jokatu beharko. Haien ordez, Donostiarrak aurreneko kanporaketari aurre egin beharko dio, ligan zazpigarren bukatu ondoren.
Orain gutxi arte, Donostiarrako neskek eta mutilek ziurtatua zuen partaidetza Kontxako Banderan, sailkatze estropadarik jokatu gabe. Mutilek araudiak ezartzen duen abantaila hori mantenduko dute, Donostian gizonezkoen beste trainerurik ez dagoelako. Aldiz, emakumezkoetan, hiriak bi traineru donostiar izan ditu 2017tik, baina ez dute sekula bien arteko kanporaketarik jokatu.
Araudiaren aldaketaren berri emateko prentsaurrekoan, Jon Insausti Kultura zinegotziak adierazi zuen hartutako erabakiak «bi klubak berdintasun egoeran» utziko dituela. Ordea, aldaketak batzuen poza eta besteen haserrea eragin du. Arraun Lagunak-ek uste du «aurrerapauso ausarta» eman duela udalak, urtetan eskatu izan dutena delako. Donostiarrak, berriz, araudia aldatzeko garaia eta modua kritikatu ditu.
Gizonezkoetan, bai
Insaustik berak aipaturiko agerraldian gogorarazi zuen 2008an Kaiarriba Donostiarra «klub bateratua» sortu zen arte, «Aste Nagusian hiriko ordezkaria erabakitzeko sailkatze estropada bat» egiten zela gizonezkoen traineru donostiarren artean. Zehazki, 1983. eta 2007. urteen artean egin zuten kanporaketa hori. Hirian gizonezkoen traineru bat baino gehiago zegoelako aldatu zuten araudia. Horrela, donostiarren arteko lehiaren irabazlea saritzea erabaki zuten. Aipatu moduan, 2017. urtean Donostiak emakumezkoen bi traineru zituen arren, ez zuten irizpide bera aplikatu.
Gizonezkoen kanporaketei dagokienez, 25 urtetan 22 estropada jokatu zituzten. 1983tik 2007ra bitarte, urtero nor baino nor aritu ziren traineru donostiarrak 1987an, 2003an eta 2005ean izan ezik. Urte horietan ez zen egin klub bakarrak eman zuelako izena. Bestalde, Ur Kirolak da kanporaketa gehien irabazi zituena; guztira, zortzi.
Donostia trainerua, Kontxako Banderan.Artxiboa
1983ko Kontxa polemikoa
Donostiako traineruen arteko lehen sailkatze estropada 1983ko Aste Nagusian jokatu zen. Ur Kirolak, Donostia eta Fortuna parez pare aritu ziren, eta aurrenekoak gainditu zituen beste biak. Dena dela, Donostiak urte hartako Kontxako Banderara sailkatzea lortu zuen irailaren 2ko kanporaketa orokorrean. Donostiako uretan jokatu zen lehena izan zen, aurretik Hondarribian izaten zelako. Sailkatze estropada hura polemikoa izan zen epaileek harturiko erabakiengatik.
Oriori epaileek zazpigarren postua ematerakoan piztu zen liskarra, bederatzigarrena izan arren, Fortunaren eta Pedreñaren atzetik. Kronometroarekin arazoak izan zituztela argudiatu zuten epaileek, baina ez zuten sailkapena aldatu. Hori dela eta, irailaren 4ko lehen jardunaldia hastear zela, Fortunak trainerua gurutzatu eta irteera oztopatu zuen. Oriorekin batera aritu behar ziren Zumaia, Kaiku eta Castro ontziek ere boikota egin zioten estropadari. Ondorioz, estropada bertan behera utzi, eta irailaren 9an jokatu zuten.
Bigarren jardunaldia, berriz, irailaren 18an izan zen, eguraldi txarrarengatik atzeratu ostean. Oriok aise irabazi zuen deskalifikatu zituzten aurkari gogorrenak falta zirelako, eta Ur Kirolak-ek lortu zuen bigarren denborarik onena. Donostiak, berriz, bosgarren tokian bukatu zuen.
Traineru donostiarren arteko azken lehia 2007an jokatu zuten Ur Kirolak-ek eta Donostia Arraun Lagunak-ek, eta bigarrenak nagusitu ziren. Ordutik, ez da besterik jokatu gizonezkoetan, eta are gutxiago emakumezkoetan.
