Galiziako uretan ariko dira Kontxako badiara iritsi aurretik
Eusko Label ligak ez du etenik, eta Donostiarrak jardunaldi bikoitza izango du asteburuan.
Donostiarraren 'Torrekua II' ontzia, Getariako estropadan.Arnaitz Rubio 
Abuztuko azken bi estropadak Galiziako uretan jokatuko dituzte Eusko Label ligako traineruek. Bihar, Bueun ariko dira (18:20), eta, etzi, Aresen (12:20). Donostiarrak denboraldiko bigarren bandera eskuratzeko beste bi aukera izango ditu. Horretarako, liga bideratua duen Orio liderra eta Zierbena bigarren sailkatua —eta pasa den igandeko irabazlea—, gainditu beharko dituzte.
Dena dela, azken txanpan maila hobea ematen ari diren beste arerio batzuk agertu zaizkio Torrekua II ontziari. Batez ere, Getaria, Urdaibai eta Hondarribia. Une honetan, sailkapen nagusiko hirugarren tokian dago Donostiarra 151 punturekin. Zortzi gehiago ditu Zierbenak (159) eta askoz ere gehiago Oriok (186). Aldiz, atzetik ditu Urdaibai (138) eta Hondarribia (127).
